ԵՐԵՎԱՆ, 13 սեպտեմբերի – Sputnik. ՀՀ ԱԺ «Հայաստան» խմբակցությունը չի պատրաստվում մասնակցել ՀՀ վարչապետ Նիկոլ Փաշինյանի հետ հարցուպատասխանին։ Այս մասին խորհրդարանում ճեպազրույցի ժամանակ ասաց խմբակցության պատգամավոր Իշխան Սաղաթելյանը։
«Հարցուպատասխանը հերթական կրկեսն է լինելու, որովհետև մեզ ոչինչ չի տալու այդ ամենը։ Մենք կներկայացնենք մեր հստակ ձևակերպված առաջարկները, կլսենք իրենց դիրքորոշումը, ինչից հետո կորոշենք մեր հետագա քայլերն ու գործողությունները։ Մենք այլընտրանքային տեքստ ունենք, որը շատ ավելի ամբողջական է և, եթե կանոնակարգը թույլ չի տալիս այդ տեքստն առաջարկելու, ապա դրա կարևոր կետերը պետք է ներառվեն ընդհանուր առաջարկներում»,– նշեց Սաղաթելյանը։
Հարցին` արդյոք հայտարարության համար պատրաստվում են վերադառնալ նիստերի դահլիճ, պատգամավորը շեշտեց` հայտարարության տեքստի ժամանակ, պայմանավորված նրանով` իրենց առաջարկությունները տեղ կգտնե՞ն, թե՞ ոչ, կորոշեն հետագա անելիքները։
Հիշեցնենք` ՀՀ պաշտպանական գերատեսչությունը հաղորդագրություն էր տարածել` հայտնելով, որ սեպտեմբերի 13-ին՝ ժամը 00:05-ից, Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Կան զոհեր ու վիրավորներ։ Հակառակորդը կիրառում է նաեւ ԱԹՍ-ներ:
Այս պահի դրությամբ իրավիճակը հայ–ադրբեջանական սահմանին շարունակում է լարված մնալ։