Ադրբեջանի ՊՆ–ն զոհերի թիվ է հրապարակել

ԵՐԵՎԱՆ, 13 սեպտեմբերի – Sputnik. Սեպտեմբերի 12-ի լույս 13-ի գիշերը Հայաստանի նկատմամբ սանձազերծած ագրեսիվ ռազմական գործողությունների հետևանքով ադրբեջանական կողմը 50 զոհ ունի։

Այս թիվը քիչ առաջ հրապարակել է Ադրբեջանի պաշտպանության նախարարությունը։

Հաղորդագրության համաձայն` 50 զինծառայողներից 42-ը ադրբեջանական բանակի, 8-ը` պետական սահմանային ծառայության զինծառայողներ են։

Նշենք, որ այս թվերը ադրբեջանական կողմի հայտարարած առաջին պաշտոնական տվյալներն են։

Հիշեցնենք` սեպտեմբերի 13-ին, ժամը 00:05-ից Ադրբեջանի ԶՈւ ստորաբաժանումները Գորիսի, Սոթքի և Ջերմուկի ուղղությամբ հրետանային միջոցներից, խոշոր տրամաչափի հրաձգային զինատեսակներից սկսել են ինտենսիվ կրակ վարել հայկական դիրքերի ուղղությամբ: Հակառակորդը կիրառում է նաև ԱԹՍ-ներ: Կան զոհեր ու վիրավորներ։

ՀՀ վարչապետ Նիկոլ Փաշինյանն ԱԺ–ում հարցուպատասխանի ժամանակ հայտնեց, որ զոհերի ճշտված թիվը 49 է։

Ադրբեջանի ագրեսիայի առնչությամբ ՀՀ կառավարությունն արդեն դիմել է ՌԴ-ին, ՄԱԿ-ին և ՀԱՊԿ-ին։