ԵՐԵՎԱՆ, 12 սեպտեմբերի – Sputnik. Ազգային ժողովում այսօր մեկնարկեց ութերորդ գումարման չորրորդ նստաշրջանը։ Նիստին մասնակցում է 60 պատգամավոր։
Ընդդիմադիր «Հայաստան» ու «Պատիվ ունեմ» խմբակցությունները նիստին ներկա չեն, թեև նախապես չէին բացառել, որ ապրիլին հայտարարած բոյկոտից հետո խորհրդարանի աշնանային նստաշրջանի աշխատանքներին կմասնակցեն։
Սեպտեմբերի 12-ին մեկնարկած հերթական նիստերի օրակարգում ընդգրկվել է 45 հարց: Դրանց թվում են նաև արդեն իսկ աղմուկ հանած` «Զենքի շրջանառության կարգավորման մասին», «Հավաքների ազատության մասին», «Որսի և որսորդական տնտեսության վարման մասին» օրենքում փոփոխություններ կատարելու մասին օրինագծերը։
ԱԺ–ն այս շաբաթ քննարկելու է նաև Սահմանադրական դատարանի դատավորներ Սեդա Սաֆարյանի ու Հովակիմ Հովակիմյանի ընտրության հարցերը, ինչպես նաև ընտրելու է Հեռուստատեսության եւ ռադիոյի հանձնաժողովի (ՀՌՀ) անդամ։ Այս պաշտոնի համար իշխող «Քաղաքացիական պայմանագիր» խմբակցությունն արդեն առաջադրել է ՀՌՀ գործող նախագահ Տիգրան Հակոբյանի թեկնածությունը, ում պաշտոնավարման ժամկետն ավարտվում է այս օրերին։