ԵՐԵՎԱՆ, 9 սեպտեմբերի – Sputnik. «Հայաստան» խմբակցությունն Ազգային ժողովի այս նստաշրջանում նույնպես շարունակելու է չմասնակցել ոչ առաջնային օրակարգերով նիստերին։ Նման հայտարարությամբ է հանդես եկել «Հայաստան» խմբակցությունը։
«Խմբակցությունը շարունակելու է կիրառել միջազգային պրակտիկայում ընդունված քաղաքական բոյկոտի գործիքը, այն է՝ չեն մասնակցելու ոչ առաջնային, հաճախ էլ արհեստական օրակարգերով լեցուն ԱԺ–իև նրա հանձնաժողովների նիստերին»,–ասված է հայտարարության մեջ։
Նշվում է նաև, որ նիստերին մասնակցությունը պայմանավորված է հանրային աջակցություն ստացած օրակարգերի առաջմղմամբ, այն է՝ Հայաստանի ու Արցախի անվտանգությունը, օրվա իշխանությունների պաշտոնանկությունը, երկրի հզորացման ազգային-պետական ուղեգծի հաստատումը։
Ընդդիմադիր խմբակցությունը հայտնում է, որ մանդատն օգտագործելու են հանրային հետաքրքրություն ու հնչեղություն ունեցող թեմաներով լսումների կազմակերպման, գործող իշխանությունների «ապազգային, հակապետական նախաձեռնությունները», նրանց կողմից երկրի սոցիալ–տնտեսական խնդիրները լուծելու անկարողությունը բացահայտելու և դրանց դեմ պայքարի ուղղությամբ:
Խմբակցությունն իր ներկայացուցիչների միջոցով շարունակելու է ակտիվ շփումներն ու աշխատանքները արտերկրի գործընկերների ու Հայաստանում հավատարմագրված դիվանագիտական ներկայացուցչությունների հետ:
«Միևնույն ժամանակ շարունակելու ենք ակտիվ գործունեություն իրականացնել ԱԺ-ից դուրս՝ մեր երկրին սպառնացող վտանգների մասին հանրային լայն շրջանակներին իրազեկելու, քաղաքական գործընթացներում ուղղակի մասնակցություն ապահովելու, «Դիմադրության» շարժմանը նոր թափ հաղորդելու, ներքին ու արտաքին անվտանգային քաղաքական խնդիրները լուծելու նպատակով»,–ասում է խմբակցությունը։
Խմբակցության պատգամավորները համոզված են, որ իշխանափոխությունն այն անհրաժեշտ նվազագույն պայմանն է, որի դեպքում է միայն հնարավոր լուծել երկրի առաջ ծառացած խնդիրները։