ԵՐԵՎԱՆ, 9 սեպտեմբերի – Sputnik. Երևանի նախկին քաղաքապետ Հայկ Մարությանի վերաբերյալ նյութերն արդեն Հակակոռուպցիոն կոմիտեում են: Այս մասին Sputnik Արմենիային հայտնեցին կոմիտեի մամուլի ծառայությունից։ «Մենք մոտ 1.5 ժամ առաջ ենք ստացել նյութերը»,– նշեցին կոմիտեից։
Կայքից հայտնում են, որ կոմիտեից իրենց տեղեկացրել են` քիչ առաջ են ստացել։
Shamshyan.com կայքն ավելի վաղ հայտնել էր, որ ոստիկանության Նոր Նորքի բաժնում նյութեր են նախապատրաստվում Երևանի նախկին քաղաքապետ Հայկ Մարությանի պաշտոնավարման ընթացքում տեղի ունեցած մի դեպքի փաստով։
Ըստ կայքի, ոստիկանության Երևան քաղաքի վարչությունում տեղեկություններ են ստացվել, որ Հայկ Մարությանը 2019 թվականի փետրվարի 18-ին առանց նպատակային նշանակությունը փոխելու արդյունաբերական ընդերքի օգտագործման և այլ արտադրական նպատակային նշանակության, Երևան քաղաքի Բագրևանդ փողոցի 110 հասցեում գտնվող հողամասում տրամադրել է «ռեստորանային համալիրի վերակառուցման, ընդլայնման և նոր մակերեսով մասնաշենք կառուցելու» նախագծման և հետագայում նաև շինարարության թույլտվություն: