ԱԺ «Քաղաքացիական պայմանագիր» խմբակցության պատգամավոր Հերիքնազ Տիգրանյանը Sputnik Արմենիայի եթերում անդրադարձել է «Հայաստանի Հանրապետությունում ստուգումների կազմակերպման և անցկացման մասին» օրենքում կատարված փոփոխությունների նախագծին, որը վերաբերում է թաքնված աշխատուժի և ոչ պատշաճ կքնված պայմանագրի դեպքերի բացահայտմանը։
Քանի որ Առողջապահական և աշխատանքի տեսչական մարմինն իրականացնում է թաքնված աշխատանքի հայտնաբերմանն ուղղված ստուգումներ, ուստի տնտեսվարողներին նախապես այդ ստուգումների մասին ծանուցելու եռօրյա ժամկետի պահպանումը տվյալ դեպքում խանգարում է թաքնված աշխատանքի և ոչ պատշաճ կքնված պայմանագրի դեպքերի բացահայտմանը։ Sputnik Արմենիայի հետ զրույցում նման կարծիք հայտնեց նախագծի համահեղինակ, ԱԺ «Քաղաքացիական պայմանագիր» խմբակցության պատգամավոր Հերիքնազ Տիգրանյանը։
Նախագծի հեղինակների հավաստմամբ` իրենք նպատակ չունեն հանկարծակիի բերել տնտեսվարողին և բացահայտելով խախտումը` ուրախանալ տնտեսվարողին տուգանելու համար, այդ տեսանկյունից նախագիծն ինքնանպատակ չէ, քանի որ կոնկրետ խնդիր է լուծում։
Նշենք, որ ԱԺ տնտեսական հարցերի մշտական հանձնաժողովի սեպտեմբերի 7-ի նիստում դրական եզրակացություն ստացավ «Հայաստանի Հանրապետությունում ստուգումների կազմակերպման և անցկացման մասին» օրենքում փոփոխություններ կատարելու մասին օրենքի նախագիծը, որի համաձայն` Առողջապահական և աշխատանքի տեսչական մարմինը թաքնված աշխատուժի և ոչ պատշաճ կքնված պայմանագրի դեպքերի բացահայտման նպատակով ստուգումներից 3 օր առաջ տնտեսվարողներին այլևս ծանուցում չի ուղարկի:
«Ստուգումների մասին օրենքում փոփոխություններ կատարելու անհրաժեշտություն առաջացավ այն առումով, որ 2019 թվականին արդեն իսկ կատարվել էին օրենսդրական փոփոխություններ աշխատանքային օրենսգրքում, որով աշխատանքի նախկին տեսչության կողմից աշխատանքային օրենսդրության նկատմամբ վերահսկողության գործառույթները վերականգնվել էին, և այդ փոփոխությունն ուժի մեջ էր մտել 2021 թվականի հուլիսի 1-ից։
Սա նշանակում է, որ աշխատանքի տեսչությանը շուրջ մեկ տարի տրվել էին վերահսկողական գործառույթներ, բայց այդ կառույցը ստուգումներ անցկացնելու մասով ամենակարևոր գործիքը չուներ»,– պարզաբանեց ԱԺ պատգամավորը։
Տիգրանյանի փոխանցմամբ` ստուգումների համար հիմք կարող են հանդիսանալ աշխատողների դիմում–բողոքները, ինչպես նաև տնտեսվարողների աշխատանքի ռիսկայնության բաղադրիչը։
Ստուգումների իրականացումը տեղի է ունենում տարեկան պլանով, ստուգաթերթի հիման վրա, և այդ պլանում ընդգրկվում են հիմնականում այն կազմակերպությունները, որոնք գնահատվել են իրենց ռիսկայնության աստիճանով։
Պատգամավորի պնդմամբ` պետք է ընդհանուր վերանայել ստուգումների մասին ամբողջ օրենքը ու ևս մեկ անգամ քարտեզագրել, թե միայն որ բացառիկ դեպքերում կարելի է վերապահում անել։
Նշենք, որ նախագծի համաձայն` ստուգումների 3-օրյա բացառման կանոնը գործելու է միայն թաքնված աշխատուժի և ոչ պատշաճ կնքած պայմանագրի դեպքում, իսկ մնացած բոլոր ստուգումների համար կգործի 3 օր առաջ ծանուցման պահանջը:
ԱԺ տնտեսական հարցերի մշտական հանձնաժողովի նիստում հավանություն ստացած նախագիծը կքննարկվի խորհրդարանի լիագումար նիստում: