ԵՐԵՎԱՆ, 8 սեպտեմբերի – Sputnik. 2020թ–ի պատերազմի ընթացքում տեղի ունեցած դեպքերին վերաբերող քրեական գործերի հետևությունը կարող է լինել այն, որ պատերազմը կարող էր այլ ելք ունենալ։ Այսօր Վլադիվոստոկում հայ համայնքի հետ հանդիպմանը հայտարարել է ՀՀ վարչապետ Նիկոլ Փաշինյանը։
«Իմ զգացողությունն այն է, որ դրանց հետևությունը լինելու է այն, որ, այո՛, կարող էր այլ ելք լիներ։ Եվ ես չափազանց կարևոր եմ համարում, որպեսզի մենք, ի վերջո, բոլորով գտնենք այդ պատասխանը. ինչո՞ւ այլ ելք չեղավ` նույնիսկ եղած ամենասուղ պայմաններում, ինչո՞ւ այդպես դասավորվեց ամեն բան։ Սրանք շատ լուրջ հարցեր են։ Եվ արդյոք ինչ–որ ուժեր կային, որոնք շահագրգռված էին պատերազմի այդ ելքով, և ոչ միայն շահագրգռված էին, այլև ուզում էին, որ այդպես լինի, որպեսզի Հայաստանում քաղաքական պրոցեսներ հարուցեն ու Հայաստանում իշխանափոխություն տեղի ունենա»,– ասաց Փաշինյանը` միաժամանակ զգուշացնելով, որ ասվածը ոչ թե պնդում է, այլ փաստերի հիման վրա արված վերլուծություն։
«Հիմա փաստեր են ի հայտ գալիս, որոնց արդյունքում այս հարցն ինձ մոտ գնալով ուժեղանում է, և ես հույս ունեմ, որ մեր իրավապահ մարմինները բավարար չափով օբյեկտիվ կգտնվեն այս հարցերի պատասխանը գտնելու համար»,– ասաց Փաշինյանը։
Վարչապետը հայտարարեց, որ իշխանությունը շահագրգռված է, որպեսզի ճշմարտությունը բացահայտվի, այլ ոչ թե փորձում է մեղքը բարդել բանակի վրա։
«Հրամանատարներից հրամաններ են եղել, եթե դա հաստատվի... Որ ես չեմ կարողանում հասկանալ ո՛չ քաղաքականապես, ո՛չ բարոյապես, ո՛չ ռազմականապես։ Հիշո՞ւմ եք, որ ասում էին` իշխանությունը Շուշին տվել է, Շուշին ծախել է։ Հիմա քրեական գործ է հարուցված, մարդ է ձերբակալվել այդ գործով, հիմա էլ հանդես են գալիս նրա պաշտպանությամբ։ Ես չեմ հասկանում՝ էդ ինչո՞ւ են պաշտպանում, հիմա ո՞վ է Շուշին տվել»,– ասաց Փաշինյանը։
ՀՀ վարչապետը համայնքի հետ հանդիպմանը խոստացավ, որ բացահայտումն արվելու է մինչև «վերջին թելը», մինչև պատերազմի մասին ողջ ճշմարտության բացահայտումը։
«Ինչո՞ւ պիտի ներենք սա, ով ուզում է լինի, ինչ պագոն ուզում է լինի ուսին, ինչ մեդալ ուզում է դոշին ունենա։ Չկա ներում այդ մարդկանց։ Ես երբեմն տպավորություն եմ ստանում, թե այդ մարդիկ ոչ թե իմ հրամաններով են առաջնորդվել, այլ եսիմ որտեղից եկող հրամաններով։ Սրանից ավելի մեծ դավաճանություն կա՞»,– ասաց Փաշինյանը։
Հիշեցնենք` 2022թ–ի սեպտեմբերի 1-ին դատախազությունը հայտարարեց, որ Արցախի ՊԲ նախկին հրամանատար, Արցախի նախագահի խորհրդական Միքայել Արզումանյանին մեղադրանք է ներկայացվել 2020 թվականի Արցախյան պատերազմի ընթացքում ռազմավարական կարևոր նշանակություն ունեցող «Արեգա» բարձունքը և հարակից մարտական դիրքերն ազատագրած անձնակազմին «նահանջ» հրաման տալու համար։
Իսկ սեպտեմբերի 2-ին գեներալ-լեյտենանտ Ջալալ Հարությունյանին մեղադրանք առաջադրվեց ծառայողական պարտականությունների նկատմամբ անփույթ վերաբերմունք դրսևորելու համար։