ԵՐԵՎԱՆ, 4 սեպտեմբերի – Sputnik. Ուկրաինայից, ԱՄՆ–ից և Մեծ Բրիտանիայից հատուկ ընտրված և նախապատրաստված «լրագրողները» ՄԱԳԱՏԷ–ի առաքելության ներկայությամբ` սեպտեմբերի 1-ին կիևյան ռեժիմի և նրա արևմտյան հովանավորների կողմից` ԶԱԷԿ–ի զավթման վերաբերյալ ծրագրվող գործողությունների ընթացքում պետք է միջազգային հանրությանը հայտնեին Կիևի ենթակայության տակ կայանի անցման մասին։ Տեղեկությունը հայտնել է ՌԴ ՊՆ–ն։
«Այդ նպատակով, ինչպես հաստատվեց սեպտեմբերի 2-ին Զելենսկու հրապարակային հայտարարությամբ, կիևյան ռեժիմը ՄԱԳԱՏԷ–ի շարասյանը ուկրաինական և արևմտյան լրագրողներով մեքենաներ էր կցել։ Այդ սադրանքի փորձը Կիևը ձեռնարկել էր ի հեճուկս առաքելության աշխատանքի, որը համաձայնեցված էր ՄԱԳԱՏԷ–ի քարտուղարության և ՄԱԿ–ի պաշտպանության և անվտանգության դեպարտամենտի կողմից», – նշում է ՌԴ Պն–ն։
Միևնույն ժամանակ, ըստ ՌԴ ՊՆ–ի հաղորդագրության, ՄԱԳԱՏԷ–ի քարտուղարության խնդրանքով, Զապորոժիեի ԱԷԿ–ում առաքելության աշխատանքը լուսաբանելու նպատակով ռուսական կողմը կայանի տարածք ապահովել էր ավելի քան 60 ԶԼՄ–ների ներկայացուցիչների այց, այդ թվում` Ֆրանսիայից, ԱՄՆ–ից, Չինաստանից, Դանիայից, Ճապոնիայից, Գերմանիայից, Թուրքիայից, Քաթարից, ԱՄԷ–ից, Հարավային Կորեայից, Վիետնամից և այլ երկրներից։
Նշվում է, որ սեպտեմբերի 1-ի առավոտյան Էներգոդար ժամանած լրագրողները ուկրաինացի դիվերսանտների կողմից Զապորոժիեի ԱԷԿ–ի վրա իրականացրած գրոհի փորձի անմիջական ականատեսը դարձան։ Ռմբապաստարաններում թաքնված ԶԼՄ–ների ներկայացուցիչներն անձամբ էին հետևում ատոմակայանի տարածքին և Էներգոդարի բնակելի թաղամասերին ուկրաինական հրետանու կողմից հասցված գնդակոծություններին։
ՌԴ ՊՆ–ում նշել են, որ ուկրաինական կամ այլ ԶԼՄ–ների որևէ ներկայացուցիչ, որը պետք է սեպտեմբերի 1-ին ուղեկցեր կիևյան ռեժիմի հսկողության տակ գտնվող տարածքից ԶԱԷԿ ՄԱԳԱՏԷ–ի փորձագետների շարասյունը, առաքելության հետ համաձայնեցված ցուցակներում չկա։
«Այս փաստը հաշվի առնելով` առաքելության աշխատանքի անվտանգության արարողակարգի կատարման նպատակով, ՄԱԳԱՏԷ–ի շարասյան հետ միասին սահմանազատման գիծը հատելու փորձ ձեռնարկող բոլոր կողմնակի անձինք կանգնեցվում էին», – ասվում է հաղորդագրության մեջ։
Հիշեցնենք` ՄԱԳԱՏԷ-ի առաքելությունը՝ գործակալության ղեկավար Ռաֆայել Գրոսսիի գլխավորությամբ, սեպտեմբերի 1-ին այցելել է Զապորոժիեի ԱԷԿ: Ատոմակայանի տարածքում ՄԱԳԱՏԷ-ի պատվիրակությանն ուղեկցել են «Ռոսատոմի» պատվիրակության ղեկավարն ու ԱԷԿ-ի աշխատակիցները` ցուցադրելով կայանի այն հատվածները, որոնք տուժել են ուկրաինական զորքերի գնդակոծությունից:
Զապորոժիեի ԱԷԿ-ը գտնվում է Դնեպրի ձախ ափին՝ Էներգոդար քաղաքի մոտ։ Բլոկների թվով և հաստատված հզորությամբ ամենամեծ ատոմակայանն է Եվրոպայում։ ԱԷԿ-ում վեց էներգաբլոկ է տեղադրված։ Մարտ ամսից ի վեր Զապորոժիեի ԱԷԿ-ը գտնվում է ռուս զինվորականների պահպանության ներքո։ ՌԴ ԱԳՆ-ում ընդգծել են ռուս զինվորականների կողմից էլեկտրակայանը պահպանության տակ վերցնելու կարևորությունը միջուկային և ռադիոակտիվ նյութերի արտահոսքը կանխելու տեսանկյունից: