ԵՐԵՎԱՆ, 4 սեպտեմբերի – Sputnik. Կառավարական կոալիցիայի կազմում ընդգրկված ԳԴՀ–ի կուսակցությունների առաջնորդները էներգակիրների բարձր գների հետ կապված երկար բանակցություններից հետո համաձայնեցրել են սեփական քաղաքացիներին տրամադրվելիք 65 մլրդ եվրոյի չափով օգնության երրորդ փաթեթը։ Այս մասին Գերմանիայի սոցիալ-դեմոկրատական կուսակցության, Գերմանիայի Ազատ դեմոկրատական կուսակցության և «Կանաչների» ղեկավարների հետ համատեղ մամուլի ասուլիսի ժամանակ հայտարարել է Գերմանիայի կանցլեր Օլաֆ Շոլցը։
«Օգնության նոր փաթեթի ծավալը 65 մլրդ եվրո է։ Ընդհանուր առմամբ խոսքը 95 մլրդ եվրոյի մասին է, եթե հաշվենք առաջին երկու փաթեթների հետ միասին», – հայտարարել է Գերմանիայի կանցլերը։
Շոլցի խոսքով` «մեր երկիրը ծանր ժամանակներ է ապրում... Լավ հասկանում եմ բարձր գների, էլետրաէներգիայի և գազի թանկացման հետ կապված քաղաքացիների մտահոգությունն ապագայի վերաբերյալ»։
Ըստ նրա` գնաճի և էներգետիկական ճգնաժամի պատճառը Ուկրաինայի դեպքերն են։
Նշվում է, որ օգնության երրորդ փաթեթը ներառելու է միանվագ վճարում ուսանողներին և կենսաթոշակառուներին համապատասխանաբար 200 և 300 եվրոյի չափով։ Բացի այդ, միանվագ սուբսիդավորում է նախատեսվում ջեռուցման ծախսերը հոգալու համար 415 եվրոյի չափով, որը կտրամադրվի մինչև 2022 թվականի դեկտեմբեր ամիսը բնակարանային նպաստ ստացողներին։
Ավելի վաղ ԳԴՀ–ի կառավարությունը քաղաքացիներին օգնելու 30 մլրդ եվրոյի չափով երկու փաթեթ էր նախապատրաստել՝ 2022 թվականի դժվարությունները հաղթահարելու համար։
Ուկրաինայի պատճառով Արևմուտքը ուժեղացրել է պատժամիջոցային ճնշումը Ռուսաստանի նկատմամբ։ Լոգիստիկ շղթաների խաթարումը Եվրոպայում և ԱՄՆ–ում վառելիքի և սննդամթերքի գնաճի է հանգեցրել։