ԵՐԵՎԱՆ, 3 սեպտեմբերի – Sputnik. Ոսկու համաշխարհային գները մի փոքր աճել են ԱՄՆ-ում զբաղվածության վիճակագրության հրապարակումից հետո։ Տեղեկությունը հայտնում է Mining.com-ը։
Գները ապրիլի վերջին սկսել էին նվազել այն սպասումով, որ ԱՄՆ Դաշնային պահուստային համակարգը կպահի բարձր տոկոսադրույքները, որպեսզի «սառեցնի» գնաճը։ Որքան բարձր են տոկոսադրույքները ֆինանսական շուկայում, այնքան ոսկին քիչ պահանջարկ ունի ներդրողների համար, քանի որ այն հուսալի է որպես ակտիվ, բայց տոկոսային շահույթ չի բերում։
Ապրիլին ոսկու գները գերազանցում էին մեկ ունցիայի դիմաց 1 900 դոլարը, սակայն օգոստոսին գտնվում էին 1700-1800 դոլարի մակարդակում, երբեմն՝ 1 700-ից ցածր: ԱՄՆ-ում զբաղվածության վիճակագրության հրապարակումից հետո ոսկու գները բարձրացան մեկ ունցիայի դիմաց 1 697-ից դոլարից մինչև 1 713 դոլար: Սակայն, շատ վերլուծաբանների կարծիքով, գների բարձրացումը կարճաժամկետ է, և ոսկին հիմնականում էժանանալու է:
Թե երբ կավարտվի բարձր գնաճը, հայտնի չէ, ուստի Դաշնային պահուստային համակարգը ստիպված է տոկոսադրույքները բարձր պահել։
«Զբաղվածության աճն այնքան զգալի չէր, որ ԴՊՀ-ն մտածեր տոկոսադրույքների նոր բարձրացման մասին։ Այդ պատճառով էլ կարճաժամկետ կտրվածքով ոսկու գները դրանից շահեցին»,– ասել է «Kitco Metals» պարբերականի վերլուծաբան Ջիմ Ուայկոֆը։
Գները մի փոքր բարձրացել են դոլարի ընկած փոխարժեքի և ԱՄՆ կարճաժամկետ պարտատոմսերի գնանշումների հաշվին։ Այնուամենայնիվ, դա չի փոխել թանկարժեք մետաղի արժեքի նվազման հիմնական միտումը։