ԵՐԵՎԱՆ, 3 սեպտեմբերի – Sputnik. Թավրիզի պետական համալսարանի հետ նախնական պայմանավորվածություն է ձեռք բերվել այնտեղ ստեղծել հայագիտության ամբիոն։ Տեղեկությունը ֆեյսբուքյան իր էջում հայտնել է ԵՊՀ ռեկտոր Հովհաննես Հովհաննիսյանը։
Նա գրել է, որ հանդիպել է Թավրիզի պետական համալսարանի ռեկտոր Սաֆար Նասրօլլահ Զադեհի հետ և նրա հետ քննարկել երկկողմ համագործակցություն հաստատելու քայլերն ու դրա շրջանակում փոխադարձ հետաքրքրություն ներկայացնող ոլորտներում համատեղ ծրագրերի իրականացման հնարավորությունները։
«Նախնական պայմանավորվածություն ձեռք բերվեց Թավրիզի պետական համալսարանում ստեղծել հայագիտության ամբիոն, որին լիովին աջակցելու պատրաստակամություն ենք հայտնել, ինչպես նաև ԵՊՀ իրանագիտության ամբիոնի շրջանակում ստեղծել Ատրպատականի ուսումնասիրությունների կենտրոն, որը տարածաշրջանային հետազոտությունների կարևոր հարթակ կդառնա»,– նշել է Հովհաննիսյանը։
Սաֆար Նասրօլլահ Զադեհի հետ հանդիպման արդյունքում պայմանավորվել են նաև իրականացնել համալսարանների ուսանողների և մասնագետների փոխանակման ծրագրեր, համատեղ հետազոտական նախագծեր, ակադեմիական ու մշակութային տարբեր նախաձեռնություններ։