ԵՐԵՎԱՆ, 1 սեպտեմբերի – Sputnik. ՀՀ կառավարությունը որդեգրել է խաղաղության օրակարգը, որը կյանքի կոչելու համար մեծ վճռականություն է անհրաժեշտ։ Այսօր ՀՀ կառավարության նիստում հայտարարեց ՀՀ վարչապետ Նիկոլ Փաշինյանը` անդրադառնալով երեկ Բրյուսելում կայացած եռակողմ հանդիպմանը։
«Մենք պիտի բոլորս հասկանանք, որ դա հեշտ չէ և պարզ չէ, հնարավոր լուծումներն էլ ակնհայտ չեն։ Մենք պետք է շարունակենք հետևողական աշխատել, և կարծում եմ` անհրաժեշտություն է ու նաև մեր ժողովրդի ցանկությունն է, որ օր առաջ մեր տարածաշրջանում հաստատվի տևական ու համապարփակ խաղաղություն։ Եվ մենք պետք է ավելի ու ավելի շատ կենտրոնանանք այս խնդրի լուծման վրա»,– ասաց Փաշինյանը։
Նա նաև նշեց, որ հանդիպումից ու ձեռք բերված պայմանավորվածություններից այլ մանրամասներ չի հաղորդում, քանի որ դրանք արդեն համառոտ ներկայացվել են պաշտոնական հաղորդագրություններում։
«Հետագայում, եթե կլինեն մանրամասներ, առաջարկներ կամ թեմաներ, որոնք այնքան հասունացած կլինեն, որ անհրաժեշտ լինի քննարկել կառավարությունում, հանրության հետ, քաղաքական ուժերի հետ, մենք դա, իհարկե, անպայման կանենք»,– ասաց Փաշինյանը;
Ինչ վերաբերում է Բրյուսելում ընդունված որոշումներին, վարչապետը հայտնեց միայն, որ դրանք եղել են աշխատանքային բնույթի։ Փաշինյանը շեշտեց, որ քննարկումը եղել է ծավալուն ու ոչ հեշտ։
Հիշեցնենք` օգոստոսի 31-ին Բրյուսելում ԵՄ խորհրդի նախագահ Շառլ Միշելի միջնորդությամբ տեղի է ունեցել Հայաստանի վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը: Ըստ պաշտոնական հաղորդագրության` հանդիպմանը Փաշինյանն ու Ալիևը պայմանավորվել են արտգործնախարարների մակարդակով շարունակել առարկայական բանակցությունները խաղաղության պայմանագրի նախագծի մշակման շուրջ: