ԵՐԵՎԱՆ, 1 սեպտեմբերի – Sputnik. Հակառուսական պատժամիջոցները «Գազպրոմին» թույլ չեն տալիս լիարժեք գազի առաքում իրականացնել դեպի Եվրոպա սարքավորումների սպասարկման հետ կապված խնդիրների պատճառով, ինչը հանգեցրել է տնտեսության մեջ ճգնաժամային իրավիճակի ստեղծման։ Այս մասին ՏԱՍՍ–ի փոխանցմամբ հայտարարել է ՌԴ նախագահի մամուլի խոսնակ Դմիտրի Պեսկովը։
Պատասխանելով լրագրողների այն հարցին, թե արդյոք Siemens ընկերության կողմից մատակարարման խնդիրների պատճառով (ՌԴ–ի դեմ պատժամիջոցների հետ կապված) «Հյուսիսային հոսքով» գազի մատակարարման ամբողջական դադարեցման վտանգ կա, Պեսկովն ընդգծել է, որ այդ հարցը պետք է ուղղել բուն կազմակերպությանը։
Կրեմլի ներկայացուցիչը նշել է նաև, որ «Գազպրոմը» պատրաստ է կատարել մատակարարումների վերաբերյալ իր պարտավորությունները։
«Սակայն տվյալ դեպքում եվրոպական կողմից իրավաբանական և տեխնոլոգիական խորչընդոտներ են ստեղծվել, որոնք թույլ չեն տալիս «Գազպրոմին» աշխատել»,– պարզաբանել է նա։
Պեսկովի խոսքով` սա ճգնաժամային իրավիճակ է, որում «խելամտության կոչ» են ուզում անել «Գազպրոմի» պայմանադիր կողմերին։
«Դեռ կարող ենք միայն փաստել, որ իրենց կողմից խելամտության մեծ պակաս կա», – եզրափակել է մամուլի քարտուղարը։
Ավելի վաղ «Գազպրոմի» ղեկավար Ալեքսեյ Միլլերը հայտարարել էր, որ «Հյուսիսային հոսք» գազատարի գործող վերջին տուրբինի հիմնանորոգումն այս պահին անհնար է իրականացնել հակառուսական պատժամիջոցների պատճառով։ Ըստ նրա` ընթացիկ աշխատանքների շրջանակում կպարզվեն բոլոր տեխնիկական և տեխնոլոգիական ռիսկերը, որոնք հնարավոր է ժամանակին վերացնել։
Օգոստոսի 31-ին «Հյուսիսային հոսք» գազատարով մատակարարումները ժամում ընկել են մինչև 0 խմ, ինչը պայմանավորված է «Պորտովայա» կոմպրեսորային կայանում պլանային վերանորոգման պատճառով 3 օրով գազի մղումը կասեցնելու հետ։