ԵՐԵՎԱՆ, 1 սեպտեմբերի – Sputnik. Թուրքական «Baykar Makina» ընկերության արտադրած «Bayraktar TB2» հարվածային անօդաչու թռչող սարքեր ներմուծող երկրների թիվը հասել է 24-ի։ Ինչպես տեղեկացնում է «Անադոլու» գործակալությունը, այդ մասին հայտնել է ընկերության գլխավոր տնօրեն Հալուք Բայրաքթարը։
«Թուրքական ընկերության արտադրած «Bayraktar TB2» հարվածային անօդաչու թռչող սարքեր ներմուծող երկրների թիվը հասել է 24-ի, իսկ արտահանումից ստացվող եկամուտների մասնաբաժինը ԱԹՍ-ներ արտադրող ընկերության եկամուտների ընդհանուր զամբյուղում կազմում է 98 տոկոս»,- ասել է նա:
Հալուք Բայրաքթարը հայտնել է նաև, որ մինչ օրս ընկերությունն արտադրել է ավելի քան 400 «Bayraktar TB2» և շուրջ 20 «Bayraktar Akıncı» անօդաչու թռչող սարքեր։
Նրա խոսքով՝ այսօրվա դրությամբ «Բայրաքթար ՏԲ2»-ի արտադրության ներուժը կազմում է տարեկան 200 միավոր։ «Մենք նախատեսում ենք հաջորդ տարի այդ ցուցանիշը հասցնել 500 միավորի, իսկ «Bayraktar Akıncı»-ինը` 40-ի»,- նշել է տնօրենը։
Նրա խոսքով` արտադրության մեջ ներդրումները չեն դադարում. հաշվի են առնում ոչ միայն Թուրքիայի պահանջները, այլև արտասահմանյան աճող պահանջարկը։
Հիշեցնենք` այդ ԱԹՍ-ները լայն ճանաչում ձեռք բերեցին 2020 թվականի 44-օրյա պատերազմի ընթացքում։