ԵՐԵՎԱՆ, 31 օգոստոսի – Sputnik. ՄԱԳԱՏԷ-ի դիտորդական առաքելությունը ժամանել է Զապորոժիե` ԱԷԿ այցելելու նպատակով։ Ինչպես հայտնում են արևմտյան ԶԼՄ-ները, 19 ավտոմեքենաներից բաղկացած շարասյունը, որոնցից 10-ը՝ ՄԱԿ-ի նշանով, մուտք է գործել Զապորոժիե քաղաք։
Ավելի վաղ ՄԱԳԱՏԷ-ի ղեկավար Ռաֆայել Գրոսսին տեղեկացրել է, որ կազմակերպության առաքելությունն արդեն ուղևորվում է Զապորոժիեի ատոմակայան և այս շաբաթ կժամանի տեղամաս։
Զապորոժիեի շրջանի իշխանությունները հայտնել էին, որ պատրաստ են ընդունել ՄԱԳԱՏԷ-ի առաքելությանն ատոմակայանում և ապահովել նրանց լիարժեք անվտանգությունը։
Միաժամանակ, շրջանային վարչակազմի ղեկավար Եվգենի Բալիցկին ՌԻԱ Նովստիին տված հարցազրույցում ասել է, որ հարց է, թե արդյոք ուկրաինական կողմը կպահպանի՞ «լռության ռեժիմը» օտարերկրյա հյուրերի այնտեղ գտնվելու ընթացքում։
Զապորոժիեի ԱԷԿ-ը գտնվում է Դնեպրի ձախ ափին՝ Էներգոդար քաղաքի մոտ։ Բլոկների թվով և հաստատված հզորությամբ ամենամեծ ատոմակայանն է Եվրոպայում։ ԱԷԿ-ում վեց էներգաբլոկ է տեղադրված։ Մարտ ամսից ի վեր Զապորոժիեի ԱԷԿ-ը գտնվում է ռուս զինվորականների պահպանության ներքո։ ՌԴ ԱԳՆ-ում ընդգծել են ռուս զինվորականների կողմից էլեկտրակայանը պահպանության տակ վերցնելու կարևորությունը միջուկային և ռադիոակտիվ նյութերի արտահոսքը կանխելու տեսանկյունից:
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 188-րդ օրը։