ԵՐԵՎԱՆ, 29 օգոստոսի – Sputnik. Ճանաչված երգչուհի Սիրուշոն դստեր` Զաբելի հետ լուսանկար է հրապարակել և գրառում արել ինստագրամյան իր էջում։
«Սա մեկ ամիս առաջ էր, Զաբելի 40–րդ օրն էր... Ու այն մեզ համար շատ խորհրդանշական էր… Արարողությունն իր աղոթքով օրհնեց Արցախի թեմի երկար տարիների առաջնորդ, Արցախի հերոս, հաղթանակի խորհրդանիշ Պարգև սրբազանը...», – գրել է Սիրուշոն։
Հաշվի առնելով, որ նրանք մի քանի օր առաջ են վերադարձել Հայաստան, կարելի է ենթադրել, որ արարողությունն անցկացվել է ԱՄՆ–ի հայկական եկեղեցիներից մեկում։
Երգչուհու էջի հետևորդները բազմաթիվ շնորհավորանքներ են գրել ու խաղաղ մանկություն մաղթել փոքրիկին։
«Աստծո օրհնությունը հրաշք Զաբելին։ Աստված պահպանի փոքրիկին չարիքից։ Երջանիկ ու խաղաղ մանկություն»,–գրել են նրանք։
Հիշեցնենք, որ երգչուհի Սիրուշոյի և ՀՀ երկրորդ նախագահ Ռոբերտ Քոչարյանի կրտսեր որդու` Լևոն Քոչարյանի դստեր ծնվելու մասին հայտնի դարձավ հունիսի 26-ին։ Նրանք ունեն նաև 2 որդի` Ռոբերտն ու Միքայելը, որոնք նույնպես ծնվել են ԱՄՆ-ում։
Անդրադառնալով դստեր անվան ընտրությանը՝ երգչուհին տեղեկացրել էր, որ Զաբելը իր և ամուսնու մայրիկների՝ Սյուզան Մարգարյանի և Բելլա Քոչարյանի անունների միացությունն է։