ԵՐԵՎԱՆ, 29 օգոստոսի – Sputnik. Մոսկվան հուսով է, որ ՄԱԳԱՏԷ-ի առաքելությունը օբյեկտիվ եզրակացություններ կանի Զապորոժիեի ԱԷԿ կատարած այցից։ Դրանք չպետք է քաղաքական երանգ ունենան։ Այս մասին «Ռոսիա 24» հեռուստաալիքի եթերում հայտարարել է ՌԴ ԱԳՆ պաշտոնական ներկայացուցիչ Մարիա Զախարովան։
Նրա խոսքով` Մոսկվան նման հույս ունի` ելնելով այն փաստից, որ ՄԱԳԱՏԷ-ի փորձագետների առաքելությունը բաղկացած է ոլորտի մասնագետներից, որոնք արհեստավարժորեն են զբաղվում են միջուկային էներգիայի, միջուկային օբյեկտների խնդրով։
«Նրանք պետք է եզրակացություններ անեն` հիմնվելով իրենց պրոֆեսիոնալիզմի վրա, այն բանի վրա, թե ինչ կտեսնեն, ինչպես կգնահատեն իրավիճակը` ելնելով իրենց մասնագիտական հմտություններից, կոմպետենտությունից»,- հավելել է ՌԴ ԱԳՆ պաշտոնական ներկայացուցիչը։
Ատոմային էներգիայի միջազգային գործակալության (ՄԱԳԱՏԷ) գլխավոր տնօրեն Ռաֆայել Գրոսսին այսօր հայտարարել է, որ կազմակերպության դիտորդական առաքելությունն այս շաբաթ կայցելի Զապորոժիեի ատոմակայան։
Զապորոժիեի ԱԷԿ-ը գտնվում է Էներգոդար քաղաքի հարևանությամբ` Դնեպրի ձախ ափին։ Այն Եվրոպայում ԱԷԿ-ի բլոկների թվով և սահմանված հզորությամբ ամենամեծն է։ Մարտից ատոմակայանը ՌԴ զինվորականների պաշտպանության ներքո է։
Հատուկ գործողության ընթացքում ՌԴ զինվորականները վերահսկողության տակ են վերցրել Խերսոնի մարզն ու Զապորոժիեի մարզի մերձազովյան հատվածը։ Երկու շրջաններում էլ նոր վարչակազմեր են ձևավորվել, հեռարձակվում են ռուսական հեռուստաալիքներ և ռադիոկայաններ, վերականգնվում են առևտրային և տրանսպորտային կապերը Ղրիմի հետ: Տարածաշրջանները հայտարարել են Ռուսաստանի կազմում ընդգրկվելու մտադրության մասին։ Բացի այդ, ութ տարի անց ապաշրջափակվել է Հյուսիս-Ղրիմյան ջրանցքը, ջուրը կրկին հասնում է թերակղզի։