Մարդիկ հրաժարվում են այլ ծախսերից, որպեսզի կարողանան գոնե իրենց դպրոցահասակ երեխաների հագուստի հարցը լուծել։ Բացի դրանից, զգալի գնաճ է գրանցվել նաև գրենական պիտույքների շուկայում, որտեղ տարբեր հաշվարկներով` միջին գնաճը կազմել է 10-20 տոկոս, իսկ առանձին ապրանքատեսակների պարագայում գնաճը հասել է նույնիսկ 50 տոկոսի, Sputnik Արմենիայի հետ զրույցում ասաց տնտեսագետ Սուրեն Պարսյանը։
Նրա դիտարկմամբ` 2022 թվականն աչքի է ընկնում աննախադեպ բարձր գնաճով, ինչը պայմանավորված է ներքին ու արտաքին գործոններով, և չնայած պաշտոնապես հրապարակված տնտեսական աճի ցուցանիշներին`մարդկանց եկամուտները համաչափ չեն աճել։
«Պետք է առանձնացնել այն ապրանքների հետ կապված ծախսերը, որոնք բոլոր ընտանիքները կատարում են սեպտեմբերի 1-ին ընդառաջ։ Օրինակ` հագուստն ընթացիկ տարում զգալի գնաճ է արձանագրել և առաջին կիսամյակի կտրվածքով թանկացել է 9,3 տոկոսով, այսինքն` ընտանիքներն այդքան թանկ պետք է վճարեն իրենց դպրոցահասակ երեխաների հագուստի համար, մինչդեռ մարդկանց եկամուտները 10 տոկսով չեն աճել, կենսամակարդակն էլ նվազել է։ Պետությունը պետք է մտածի, թե ապագայում ինչ քայլեր իրականացնի, որպեսզի սոցիալական խնդիրները մեղմվեն»,– ասաց տնտեսագետը։
Պարսյանի կարծիքով` հասարակությունը աղքատանում է, մինչդեռ կառավարությունը հայտարարում է տնտեսական աճի մասին։ Ըստ նրա` պետությունը պետք է ուշադրություն դարձնի նաև կրթական ծառայությունների մատչելիության խնդրի վրա, քանի որ կրթական ոլորտին առնչվող ծախսերը նույնպես զգալի աճ են արձանագրել։ Դա վերաբերում է ինչպես բարձրագույն, այնպես էլ միջին մասնագիտական ու նախապրոցական կրթությանը։
«Պետական մակարդակով հաշվարկներ չեն կատարվում, թե օրինակ մեկ երեխայի դեպքում միջինը որքան գումար է հարկավոր պատշաճ կերպով դպրոց ներկայանալու համար։ Նման հաշվարկներ սովորաբար արվում են ընտանիքներում։ Ընդ որում` մարզի, գյուղի կամ Երևանի աշակերտի ծախսերը տարբեր են և կարող են տատանվել 50 հազարից մինչև 100 հազարի սահմաններում, իսկ եթե ընտանիքում կան մի քանի դպրոցահասակ երեխաներ, ապա լուրջ խնդիրներ են առաջանում։ Աղքատությունը, անշուշտ, բացասաբար է անդրադառնում երեխաների զարգացման վրա, հետևաբար նման հեռանկարը բացառելու համար նրանք պետք է ապահովված լինեն բոլոր անհրաժեշտ պարագաներով»,– ասաց տնտեսագետը։
Պարսյանի խոսքով` պետական քաղաքականության հիմքում պետք է դրվի նաև դպրոցներից սոցիալական բևեռացվածության խնդիրը հանելու դրույթը, ինչը կարելի է իրականացնել զանազան գործիքակազմով, Օրինակ` կարելի է ներդնել միասնական հագուստի պրակտիկան, ինչպես նաև մինչև չորրորդ դասարանցիների համար նախատեսված սննդի ապահովման ծրագիրը տարածել նաև բարձր դասարանցիների վրա, միչդեռ պետական միջոցները, ըստ տնտեսագետի, ծախսվում են այլ ուղղություններով ու առաջնահերթություններով։ Ըստ նրա` պետական քաղաքականությունը նման կերպ երկարաժամկետ հեռանկարում ձախողվում է, իսկ գնաճի պայմաններում աղքատությունը կրում է շարունակական բնույթ։
Պաշտոնական վիճակագրության համաձայն, 2022 թվականի առաջին կիսամյակում Հայաստանում գնաճը կազմել է 8.1%։ Հունիսին` 2021թ–ի հունիսի նկատմամբ, գնաճը 9 տոկոսից հասել է 10,3 տոկոսի: