ԵՐԵՎԱՆ, 29 օգոստոսի – Sputnik. Ամերիկայից Թբիլիսի է ժամանել բժշկական փորձագետ Էրիկ Գոլդսմիթը, որը իրականացրել է հիվանդանոցում գտնվող դատապարտյալ, նախկին նախագահ Միխեիլ Սաակաշվիլիի դատահոգեբուժական փորձաքննությունը։ Այս մասին լրագրողներին հայտնել է քաղաքական գործչի փաստաբան Շալվա Խաչապուրիձեն։ Նրա խոսքը մեջբերում է ՌԻԱ Նովոստին։
Սաակաշվիլին բուժում է անցնում Թբիլիսիի «Վիվամեդ» կլինիկայում երկարատև հացադուլի հետևանքները բուժելու համար։ Ավելի վաղ նրա ընտանիքի անդամները հայտնել էին, որ բժիշկները նրա մոտ շուրջ 17 հիվանդություն են ախտորոշել։
«Հետազոտությունների առաջին մասն ավարտված է, երկրորդը կանցկացվի մի քանի ժամից։ Փորձաքննության հաշվետվությունը կստացվի ԱՄՆ-ից։ Փորձագետը դատահոգեբուժական փորձաքննություն է անցկացրել, խոսակցությունը ձայնագրվել է։ Երկրորդ մասը թեստավորում է ենթադրում։ Վերջնական հաշվետվության համար 3-4 օր կպահանջվի»,- ասել է փաստաբանը։
Նրա խոսքով` հաշվետվությունը պետք է երկու հիմնական հարցի պատասխանի. արդյոք Սաակաշվիլին ծանր հիվա՞նդ է, և խանգարո՞ւմ է դա նրան պատիժը կրելու հարցում։ Խաչապուրիձեն հավելել է, որ երկուշաբթի Սաակաշվիլիին կայցելի նաև ՄԱԿ-ի փորձագետը։
Հիշեցնենք` Վրաստանի նախկին նախագահ Միխեիլ Սաակաշվիլին, որը նախկինում Ուկրաինայում մի շարք առանցքային պաշտոններ է զբաղեցրել, այժմ կալանքի տակ է հայրենիքում: Նա Վրաստան էր վերադարձել 2021 թվականի սեպտեմբերին և անմիջապես ձերբակալվել։
Նրան 6 տարվա ազատազրկման են դատապարտել բանկիրի սպանության և պատգամավորին ծեծի ենթարկելու գործով։ Քաղաքական գործչին մեղադրում են նաև սահմանն ապօրինի հատելու, պետական միջոցները մսխելու և 2007 թվականին ընդդիմության ցույցը ցրելու մեջ։