Կոտայքի մարզի Նոր Հաճն քաղաքում պարտքի դիմաց մի կնոջ են առևանգել ու ամուսնուց գումար պահանջել։ Տեղեկությունը հայտնում է ՀՀ ոստիկանությունը։
Ըստ հաղորդագրության` օգոստոսի 24-ին` կեսգիշերն անց, ոստիկանություն ահազանգած տղամարդը հայտնել է, որ Նոր Հաճնի քաղաքապետարանից իր կնոջն առևանգել են, պահանջում են հանդիպում ու 200 000 դրամ։
Ոստիկանները պարզել են, որ կնոջը ժամեր առաջ առևանգել են Երևանի երեք բնակիչներ՝ երկու տղամարդ և մի կին։ Պարզվել է նաև, որ առևանգած կնոջը նրանք պահում են Երևանի Թբիլիսյան խճուղում, մեքենայի մեջ և միաժամանակ զրուցում ամուսնու հետ` նշելով ազատ արձակելու պայմանը։
Առևանգումից ժամեր անց ոստիկանները նրանց հայտնաբերել են Երևանի Ահարոնյան փողոցում և ձերբակալել։
Ըստ նախնական տվյալների՝ առևանգվածի ամուսնու և առևանգողների միջև պարտք ու պահանջի խնդիր է եղել:
Նախաձեռնվել է քրեական վարույթ։ Կատարվում է նախաքննություն: