ԵՐԵՎԱՆ, 26 օգոստոսի – Sputnik. Երևանի «Սուրմալու» առևտրի կենտրոնում տեղի ունեցած պայթյունի հետևանքով 4 ձերբակալվածից մեկը կենտրոնի փոխտնօրենն է, մեկը` պայթած տարածքի վարձակալը, մյուս երկուսն էլ պահեստը շահագործողներն են։ Տեղեկությունը Sputnik Արմենիայի հետ զրույցում ասաց ՀՀ քննչական կոմիտեի մամուլի խոսնակ Վարդան Թադևոսյանը։
«Փոխտնօրենն ու պահեստի վարձակալը մեղադրվում են Հրդեհային անվտանգության կանոնները կամ պահանջները խախտելու մեջ, ինչն անզգուշությամբ առաջացրել է մարդու մահ կամ այլ ծանր հետևանք (ՀՀ քրեական օրենսգրքի 357-րդ հոդվածի 2-րդ մաս)։ Պահեստը շահագործողները մեղադրվում են անզգուշությամբ երկու կամ ավելի անձի կյանքից զրկելու մեջ (ՀՀ ՀՀ քրեական օրենսգրքի 165-րդ հոդվածի 2-րդ մաս)»,– նշեց Թադևոսյանը։
ՀՀ ՔԿ խոսնակն ասաց, որ պայթյունը եղել է պայթուցիկների պահեստում։
Հիշեցնենք` «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։ 16 մարդ մահացել է, մեկ մարդ համարվում է անհետ կորած։
ՀՀ վարչապետ Նիկոլ Փաշինյանի որոշմամբ օգոստոսի 17-ը և 18-ը հայտարարվել էին սգո օրեր։