ԵՐԵՎԱՆ, 25 օգոստոսի – Sputnik. Հայաստանի մարդու իրավունքների պաշտպան Քրիստինե Գրիգորյանը պարզաբանումներ է պահանջել ոստիկանությունից երեկ Ազատության հրապարակում կայացած հակառուսական ցույցի մասնակիցներին բերման ենթարկելու համար։
«Բերման ենթարկելու հիմքերի ու երթի չթույլատրման վերաբերյալ Մարդու իրավունքների պաշտպանը պարզաբանումներ է պահանջել ոստիկանությունից» , - գրել է Գրիգորյանը «Ֆեյսբուքում»։
Նաև ՄԻՊ աշխատակազմի ներկայացուցիչներն այցելել են ոստիկանության համապատասխան բաժին՝ բերման ենթարկված անձանց իրավունքների պաշտպանությունն ապահովելու նպատակով։ ՄԻՊ ներկայացուցիչներն առանձնազրույցներ են ունեցել բերման ենթարկվածների հետ, կապի մեջ են գտնվել փաստաբանի հետ։ Ոստիկանության կողմից տեղեկացվել է նաև, որ օրենքով սահմանված ժամկետում բերման ենթարկված բոլոր անձինք ազատ են արձակվել։
Հիշեցնենք՝ օգոստոսի 24-ին Ուկրաինայի անկախության տոնի կապակցությամբ մի խումբ ակտիվիստներ հակառուսական ցույց էին կազմակերպել Ազատության հրապարակում։ Ինը հոգի բերման էր ենթարկվել, նրանց թվում բլոգեր Ալեքսեյ Ռոմանովը։