ԵՐԵՎԱՆ, 25 օգոստոսի – Sputnik. Ուկրաինայի նախագահ Վլադիմիր Զելենսկու ճնշումը Հռոմի պապ Ֆրանցիսկոսի վրա՝ Կիևին աջակցելու հարցում, քահանայապետի դժգոհությունն է հարուցել. հայտնել է Վատիկանի մասնագետ, IL Fatto Quotidiano-ի լրագրող Մարկո Պոլիտին:
Մասնավորապես, Վատիկանում այնքան էլ չեն հասկանում Զելենսկու թվիթերյան գրառումը, որում նա աշխարհի կրոնական առաջնորդներին կոչ է անում բացասական տեղեկատվություն տարածել Ռուսաստանի մասին։
«Այդ թվիթը հիանալի ցույց է տալիս, որ Հռոմի պապ Ֆրանցիսկոսը և Կիևի քաղաքականությունը տարբեր կողմերում են։ Վատիկանին դուր չի գալիս, երբ քահանայապետին ասում են, թե նա ինչ պետք է անի, ինչպես նաև այն փաստը, որ Ուկրաինայի իշխանությունները գրաքննության են ենթարկել պապի խաչերթի հեռուստատեսային հեռարձակումը, որովհետև դրանում ուկրաինացիների և ռուսների միջև խաղաղության գաղափար էր հնչում»,- բացատրել է Պոլիտին:
IL Fatto Quotidiano-ի լրագրողը նշել է նաև, որ ներկայումս Հռոմի պապի վրա իսկապես ճնշում է գործադրվում Ուկրաինայի առաջնորդի կողմից։ Բանն այն է, որ Զելենսկին ցանկանում է, որ քահանայապետը հնարավորինս արագ գա Կիև, բայց ինքը՝ Ֆրանցիսկոսը, Ուկրաինայի մայրաքաղաք չի այցելի, քանի դեռ չի այցելել Մոսկվա։