ԵՐԵՎԱՆ, 25 օգոստոսի – Sputnik. Ղազախստանի հավաքականը Հայաստանում հաղթել է Միջազգային բանակային խաղերի «Խաղաղության մարտիկ» մրցույթում։ ՌԴ ՊՆ-ում հայտնել են, որ մրցույթի հաղթողներին պարգևատրել է ՌԴ պաշտպանության փոխնախարար Վիկտոր Գորեմիկինը։
ՌԴ ԶՈւ հավաքականը երկրորդն է, Բելառուսինը` երրորդը։ Պարգևատրման արարողությունն անցկացվել է Դիլիջանի Մոնթե Մելքոնյանի անվան ռազմամարզական վարժարանում։
«Մեր մրցույթը մարտական ուսուցման ժամանակակից ձևաչափ է, որում առավելագույնս արտացոլված է մրցակցության, հաղթանակի հասնելու համար անզիջում, բայց ազնիվ և արդար պայքարի սկզբունքը»,- ընդգծել է Գորեմիկինը։
«Խաղաղության մարտիկ» մրցույթի ծրագիրը երեք փուլ է ներառում` ինտելեկտուալ («Էրուդիտ»), ռազմամարզական («Աթլետ»), ռազմամասնագիտական («Ռատնիկ»), իսկ ընդհանուր ստուգարքից դուրս անցկացվում է գրական-գեղարվեստական ու պարային «Արվեստ» փուլը։