Եթե նոր համանախագահ է նշանակվում, ուրեմն ԱՄՆ–ն կարևորում է ԵԱՀԿ Մինսկի խմբի գործունեությունը և այդ շրջանակում իրականացվող աշխատանքը, մանավանդ որ այդ անձը լիազորվում է լրացուցիչ ուղղություններով զբաղվելու հանձնառությամբ։ ԵԱՀԿ ՄԽ ամերիկացի նոր համանախագահի նշանակումը Sputnik Արմենիայի հետ զրույցում այսկերպ մեկնաբանեց Ամերիկյան հետազոտությունների հայկական կենտրոնի տնօրեն, քաղաքագետ Սուրեն Սարգսյանը։
Նշենք, որ ԱՄՆ պետքարտուղար Էնթոնի Բլինկենն այսօր Ֆիլիպ Ռիքերին նշանակել է Կովկասյան բանակցություններում ԱՄՆ ներկայացուցիչ և ԵԱՀԿ Մինսկի խմբի համանախագահ։ Պետդեպարտամենտը նաև հաստատել է, որ պատրաստ է օգնել Հայաստանին և Ադրբեջանին Լեռնային Ղարաբաղի հակամարտության կարգավորման բանակցություններում:
Սարգսյանը նկատում է, որ այս քայլով ԱՄՆ-ն ցույց է տալիս, որ Մինսկի խմբի մահվանը կողմ չէ, ինչին ձգտում է Ադրբեջանը, ուստի մեսիջ է ուղարկում նաև Ադրբեջանին։
«Երկրորդ հերթին պետք է առանձնացնել այն հանգամանքը, որ Ֆիլիպ Ռիքերն ըստ էության նշանակվում է ոչ միայն որպես ԵԱՀԿ Մինսկի խմբի համանախագահ, զբաղվելու է ոչ միայն Լեռնային Ղարաբաղի խնդրով, այլև այլ հարցերով, մասնավորապես Վրաստանի` այսպես կոչված ժնևյան քննարկումների ձևաչափում լինելու է ԱՄՆ-ի ներկայացուցիչը։ Փաստորեն Պետդեպն ունենալու է մեկ ներկայացուցիչ, որը զբաղվելու է մեր ամբողջ տարածաշրջանով, այսինքն` Հարավային Կովկասի կոնֆլիկտներով»,– նշեց քաղաքագետը։
Սարգսյանի դիտարկմամբ` ԱՄՆ–ն կարևորություն է տալիս մեր տարածաշրջանի ոչ թե առանձին երկրների հետ հարաբերությունները խորացնելուն, այլ ռեգիոնալ ընդգրկուն քաղաքականություն վարելուն։ Սա էական առանձնահատկություն է, հաշվի առնելով Միացյալ Նահանգների քաղաքական առաջնահերթությունները Հարավայի Կովկասում, առավել ևս, որ ռեգիոնը հարևան է ԱՄՆ–ի դաշնակից Թուրքիային, ախոյան Իրանին և տարածաշրջանում նրանց համար թիվ մեկ մարտահրավեր հանդիսացող Ռուսաստանին։
Քաղաքագետի կարծիքով` չնայած Ռուսաստանի և Արևմուտքի միջև առկա լարված հարաբերություններին`Մինսկի խմբի համանախագահությունը տակավին գտնվում է Միացյալ Նահանգների ուշադրության կենտրոնում։ Միևնույն է, մի օր Ռուսաստանը և Արևմուտքն ինչ-որ կերպ կարգավորվելու են իրենց հարաբերությունները, ուստի Մինսկի խմբի համանախագահների խումբը կարող է իր գործունեությունը վերսկսելու հնարավորություն ունենալ։
Հիշեցնենք, որ մինչ այս ԵԱՀԿ ՄԽ ամերիկացի համանախագահն էր Էնդրյու Շոֆերը։