«Սուրմալուում» որոնողական աշխատանքները դադարեցվել են. քաղաքացու մարմինը չեն գտել

ԵՐԵՎԱՆ, 24 օգոստոսի – Sputnik. «Սուրմալու» առևտրի կենտրոնում որոնողական աշխատանքները դադարեցվել են։ Տեղեկությունը հայտնում է ՀՀ արտակարգ իրավիճակների նախարարի մամուլի խոսնակ Հայկ Կոստանյանը։

««Սուրմալու» առևտրի կենտրոնում տեղի ունեցած պայթյունի հետևանքով անհետ կորած համարվող քաղաքացուն հայտնաբերելու համար տարվող որոնողական աշխատանքները վերջին մի քանի օրերի ընթացքում իրականացվել են հավանական պայթյունի վայրում, որտեղ, ըստ տեղեկատվության, հավանաբար գտնվել է քաղաքացին։ Պայթյունի էպիկենտրոնում և մերձակա ամբողջ տարածքում իրականացվել են մանրակրկիտ որոնողական աշխատանքներ, որոշ հատվածներում` նույնիսկ կրկնակի։ Որոնողական աշխատանքների արդյունքում, ցավոք, քաղաքացու մարմինը կամ մասունքները չեն հայտնաբերվել»,- ֆեյսբուքյան իր էջում գրել է նա։

Կոստանյանը նշել է, որ առաջացած հրդեհից և պայթյունից հետո 43 ժամվա ընթացքում փրկարար ծառայողները փլատակներից դուրս են բերել 26 քաղաքացու, 10-ը ողջ են եղել, 16-ը` մահացած։

«Այսպիսով, ընդլայնված շտաբի նիստում որոշում է կայացվել դադարեցնել որոնողական աշխատանքները»,- եզրափակել է նա։

Հիշեցնենք` «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։ Անհետ կորած է համարվում 1967 թ. ծնված Վանիկ Խաչիկի Ամիրխանյանը։