ԵՐԵՎԱՆ, 24 օգոստոսի – Sputnik. Հոլիվուդյան աստղ Սիլվեստր Ստալոնեի կինը՝ մոդել Ջենիֆեր Ֆլավինը, 25 տարվա ամուսնությունից հետո ամուսնալուծության հայց է ներկայացրել դատարան։ Տեղեկությունը հայտնում է TMZ պորտալը՝ վկայակոչելով դատական փաստաթղթերը։
Զույգի ամուսնալուծության մասին լուրերը տարածվեցին անցյալ շաբաթ: Հրատարակության տվյալներով՝ Ֆլավինը ամուսնալուծության հայց է ներկայացրել օգոստոսի 19-ին։ Այս որոշման պատճառը, ըստ տեղեկությունների, դժգոհությունն է եղել ամուսնու գործողություններից.նա ակտիվները հանում էր ընտանեկան ֆոնդերից։
Ջենիֆերը ցանկանում է վերականգնել իր օրիորդական ազգանունը և հասնել համատեղ ակտիվներին վերաբերող գործարքների դատական արգելքի։
Նշենք, որ օրեր առաջ հայտնի էր դարձել, որ Սիլվեստր Ստալոնեն աջ ուսին առկա դաջվածքը, որում պատկերված էր կինը՝ Ջենիֆեր Ֆլավինը, «ծածկել էր» իր սիրելի շան նկարով, որը սատկել էր մի քանի տարի առաջ։
Երկրպագուների շրջանում դա իրարանցում էր առաջացրել։ Զույգի հնարավոր բաժանման մասին խոսակցություններն «ամրապնդել էր» Ֆլավինը, երբ սոցցանցերում լուսանկար էր հրապարակել իր երեք դուստրերի հետ՝ մակագրելով. «Մնացածը կարևոր չէ: Ընդմիշտ չորսս»։
Ստալոնեի ներկայացուցիչը հայտարարել է, որ նա սիրում է իր ընտանիքը, և զույգն այժմ համատեղ ռեալիթի շոու է նկարահանում։ Դերասանը ձեռնպահ է մնացել այլ մեկնաբանություններից։
Ստալոնեն և Ջենիֆեր Ֆլավինն ամուսնացել են 1997 թվականին։ Նրանք ունեն երեք դուստր։