ԵՐԵՎԱՆ, 23 օգոստոսի – Sputnik. Գերմանիան պատժամիջոցներով ավելի շատ ինքն իրեն է վնասում, քան Ռուսաստանին։ Այս մասին հայտարարել է «Գերմանիայի համար այլընտրանք» ընդդիմադիր կուսակցության ղեկավար Թինո Կրուպալան` բացատրելով հակառուսական պատժամիջոցները վերացնելու իրենց պահանջը։
«Այն, որ պատերազմը պետք է հնարավորինս շուտ ավարտվի` այդ կոչը կարելի է ամեն օր անել»,- ասել է Կրուպալան` պատասխանելով գերմանացի լրագրողի նկատառմանը, որ կուսակցությունը պնդում է, թե Ռուսաստանից պետք է գազի մատակարարումները լինեն, բայց կոչ չի անում ավարտել հակամարտությունը Ուկրաինայում։
«Իհարկե, անհրաժեշտ է, որպեսզի հնարավորինս շուտ բանակցություններ տեղի ունենան, որ դիվանագիտական որոշում լինի։ Բայց դա տեղի չի ունենա առճակատման միջոցով, որի ընթացքում մենք շարունակում ենք այս պատերազմի էսկալացիան, որպեսզի իբր վնասենք Ռուսաստանին։ Մենք ինքներս մեզ ավելի շատ ենք վնասում, քան Ռուսաստանին։ Սա է ներկայիս իրավիճակը։ Եվ ես, որպես գերմանացի քաղաքական գործիչ, կոչված եմ պաշտպանելու մեր քաղաքացիներին, մեր ընկերությունները, ոչ թե ռուսներին»,– ասել է Կրուպալան։
Ավելի վաղ «Գերմանիայի համար այլընտրանք» կուսակցությունը կոչ էր արել հանել հակառուսական պատժամիջոցները` անվանելով դրանք բացարձակ անարդյունավետ և հայտարարելով, որ Ռուսաստանի դեմ տնտեսական պատերազմից ավելի շատ տուժում է Գերմանիան։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Փետրվարի 21-ից ի վեր, երբ Վլադիմիր Պուտինը հայտարարեց ԼԺՀ-ն ու ԴԺՀ-ն ճանաչելու որոշման մասին, ԱՄՆ-ն, Եվրամիությունն ու Արևմուտքի շատ երկրներ պատժամիջոցների շարք սահմանեցին Ռուսաստանի դեմ։ Պատժամիջոցներն առնչվում են բանկային ոլորտին, ավիացիային, տնտեսության տարբեր ճյուղերին, կապի ոլորտին և անգամ մշակույթին ու սպորտին։
Ի պատասխան Ռուսաստանի նախագահ Վլադիմիր Պուտինը մարտի 23-ին հայտարարեց, որ ԵՄ երկրներն ու Ռուսաստանի դեմ պատժամիջոցներ սահմանած մյուս պետությունները գազի մատակարարման դիմաց կվճարեն ռուբլով: Այնուհետ նա ստորագրեց համապատասխան հրամանագիր և հայտնեց, որ եթե ոչ բարեկամական երկրները ապրիլի 1-ից ռուբլով չվճարեն, ապա Ռուսաստանը դա կհամարի գազային պայմանագրերի գծով պարտավորությունների չկատարում:
Ուկրաինայում մարտական գործողություններն ընթանում են արդեն 180-րդ օրը։