ԵՐԵՎԱՆ, 23 օգոստոսի – Sputnik. Իրաքի վարչապետ Մուստաֆա Ալ Քազեմին ընդհատել է իր այցը Եգիպտոս՝ Բաղդադի Բարձրագույն դատական խորհրդի շենքի մոտ բողոքի ակցիաների պատճառով։ Այս մասին հայտնում է ՌԻԱ Նովոստին՝ հղում անելով Իրաքի կառավարության ղեկավարի գրասենյակի հայտարարությանը։
Իրաքի ղեկավարը Եգիպտոսի էլ-Ալամեյն քաղաքում մասնակցում էր արաբական մի շարք պետությունների ղեկավարների գագաթնաժողովին, որը մեկնարկել է օգոստոսի 22-ին։
«Երեքշաբթի առավոտյան վարչապետ Մուստաֆա Ալ Քազեմին երկրում իրադրության զարգացման լույսի ներքո և ուժային կառույցների կողմից դատական իշխանության և պետության մարմինների պաշտպանության իրենց պարտականությունների կատարման նկատմամբ անմիջական վերահսկողության նպատակով ընդհատել է իր այցը Եգիպտոս և վերադարձել է Բաղդադ»,- ասված է հայտարարության մեջ:
Ավելի վաղ ազդեցիկ շիա քաղաքական գործիչ Մուքթադա աս-Սադրը, որի կողմնակիցները շարունակում են բողոքի ակցիաները Իրաքի խորհրդարանում, երկրի Գերագույն դատական խորհրդին կոչ էր արել ցրել օրենսդիր ժողովը։ Դատական մարմինը մերժումով էր պատասխանել։
Հիշեցնենք, որ Իրաքը քաղաքական ճգնաժամի մեջ է։ Դեռ 2021 թվականի հոկտեմբերին կայացած խորհրդարանական ընտրություններից հետո երկրի քաղաքական ուժերն այդպես էլ չկարողացան հանրապետության նոր նախագահ ընտրել և կառավարություն ձևավորել։
Մայիսին խորհրդարանական ընտրություններում հաղթած աս-Սադրի դաշինքը կառավարության ձևավորման մի քանի նախաձեռնությունների ձախողումից հետո հայտարարեց ընդդիմություն դառնալու մասին՝ այդպիսով մյուս կուսակցություններին և անկախ խորհրդարանականներին հնարավորություն տալով կառավարություն ձևավորել։ Հունիսին դաշինքի պատգամավորները հրաժարական տվեցին կառավարության ձևավորման ձգձգվող ճգնաժամի ֆոնին։