ԵՐԵՎԱՆ, 22 օգոստոսի – Sputnik. Ուկրաինայի զինվորականները Սլավյանսկում ականապատել են Կազյոնի Տորեց գետի վրայով անցնող կամուրջը և ուզում են պայթեցնել այն` ՌԴ զինված ուժերին դրանում մեղադրելու համար։ Այս հայտարարությունն արել է ՌԴ պաշտպանական վարչության ազգային կենտրոնի պետ, գեներալ–գնդապետ Միխայիլ Միզինցևը։
Նա կրկին ընդգծել է, որ ՌԴ զորքն ու Դոնեցկի և Լուգանսկի ժողովրդական հանրապետությունների զորամիավորումները ռազմական հատուկ գործողությունների խնդիրների կատարման ընթացքում քաղաքացիական ենթակառուցվածքների օբյեկտներին հարվածներ չեն հասցնում։
Միզինցևը հայտնել է նաև, որ ուկրաինական զորքը, թաքնվելով խաղաղ բնակչության հետևում, հրետանի է տեղակայել Արտյոմովսկի բնակելի սեփական տներում և սադրում է ՌԴ ԶՈւ–ին։
«Արտյոմովսկի (ԴԺՀ) սեփական տների տարածքում (Իլյիչի փողոց) Ուկրաինայի ԶՈւ–ն հրետանի և ՀԿՌՀ է տեղակայել, որոնցից պարբերաբար գնդակոծում է ՌԴ ԶՈւ–ի դիրքերը` սադրելով նրանց պատասխան կրակ բացել, ընդ որում` գրոհայինները տեղի բնակչության թույլ չեն տալիս լքել սեփական տները` փաստացի օգտագործելով նրանց որպես կենդանի վահան», – ասել է գեներալը։
Բացի այդ, Ուկրաինայի տարածքային պաշտպանության ստորաբաժանումները հենակետ են կահավորել Խարկովի ավտոճանապարհային համալսարանի շենքում։
«Ուսումնական հաստատության անմիջական հարևանությամբ ազգայնականները զրահատեխնիկա են տեղակայել, իսկ մոտակա տների բնակիչներին միտումնավոր չեն տարհանել», – ասել է գեներալը։
ՌԴ ՊՆ–ի տվյալներով` «Կրակեն» ազգայնական գումարտակի գրոհայինները հենակետ են տեղակայել Տրոիցկոյեի (Խարկովի մարզ) դպրոցներից մեկում։
Բացի այդ, ըստ Միզինցևի, ուկրաինական կողմը հրետանու դիրքեր է կահավորել Խարկովի մարզի մեկ այլ բնակավայրի` Բարվենկովոյի բնակելի տների բակերում։
«Տեղի բնակիչների անվտանգությունն ապահովելու պատրվակով նրանց արգելվում է լքել տները, անվտանգ վայրեր ինքնուրույն տարհանվելու բոլոր փորձերն էլ կոպտորեն կասեցվում են», – հայտարարել է գեներալը։
Նրա խոսքով` չնայած կիևյան իշխանությունների խոչընդոտներին` Ռուսաստանը մեկ օրում շուրջ 19 հազար մարդ է տարհանել Ուկրաինայի, ԴԺՀ–ի և ԼԺՀ–ի վտանգավոր շրջաններից, ընդհանուր առմամբ մոտ 3.4 մլն մարդ է տարհանվել։ Միզինցևը նշել է, որ ՌԴ սահմանը հատել է ավելի քան 601 հազար ավտոմեքենա։
Ռուսաստանը շարունակում է մարդասիրական օգնություն տրամադրել։ Այսօր Դոնբասում, Խարկովի և Խերսոնի մարզերում 6 ակցիա է իրականացվել, բնակչությանն ավելի քան 510 տոննա առաջին անհրաժեշտության իրեր և սննդամթերք է փոխանցվել։
Մարտի 2-ից ի վեր 58 հազար 319.4 տոննա մարդասիրական օգնություն է հասցվել Դոնբասի հանրապետություններ և Ուկրաինա, անցկացվել է 1489 ակցիա։
Հիշեցնենք` փետրվարի 24-ի վաղ առավոտյան Ռուսաստանի նախագահ Վլադիմիր Պուտինը հայտարարեց, որ Ուկրաինայի նկատմամբ հատուկ ռազմական գործողության մասին որոշում է կայացրել, քանի որ ԼԺՀ-ն ու ԴԺՀ-ն դիմել են օգնության խնդրանքով։
Ուկրաինայում մարտական գործողություններն ընթանում են արդեն 178-րդ օրը։