ԵՐԵՎԱՆ, 22 օգոստոսի – Sputnik. Գյուղմթերքով բեռնված երկու բեռնանավեր դուրս են եկել ուկրաինական նավահանգիստներից՝ պարենային գործարքի շրջանակում։ Տեղեկությունը հայտնում է ՌԻԱ Նովոստին՝ հղում անելով Թուրքիայի պաշտպանության նախարարությանը։
Նախօրեին հաղորդվել է, որ Հրադադարի ռեժիմի վերահսկման և համակարգման համատեղ կենտրոնը թույլ է տվել Չերնոմորսկից դուրս գալ MV Great Arsenal-ին, որը Եգիպտոս կտանի 25,5 հազար տոննա ցորեն, և MV Maranta-ին, որը Հունաստան կտանի 5,3 հազար տոննա եգիպտացորեն:
Սևծովյան նավահանգիստներից ուկրաինական հացահատիկի դուրսբերումը տեղի է ունենում հուլիսի 22-ին Ռուսաստանի, Ուկրաինայի, Թուրքիայի և ՄԱԿ-ի ներկայացուցիչների կողմից ստորագրված պարենային գործարքի շրջանակում: Այդ փաստաթղթերի փաթեթը ենթադրում է համաշխարհային շուկաներ ռուսական գյուղատնտեսական արտադրանքի և պարարտանյութերի արտահանման սահմանափակումների վերացում, ինչպես նաև սահմանում է Ուկրաինայի վերահսկողության տակ գտնվող Սևծովյան նավահանգիստներից առևտրային նավերի անվտանգ ելքի ալգորիթմը՝ հատուկ ստեղծված ծովային հումանիտար միջանցքներով: Մարդասիրական գործողությունը ծրագրված է Ստամբուլում գործող Համատեղ համակարգող կենտրոնի կազմում աշխատող ռուս սպաների ակտիվ մասնակցությամբ:
ՄԱԿ-ը բազմիցս հայտարարել է հացահատիկի դեֆիցիտի պատճառով պարենային ճգնաժամի առաջացման վտանգի մասին։ Արևմուտքն, իր հերթին, Ռուսաստանին մեղադրում էր այն բանում, որ ուկրաինական հացահատիկը համաշխարհային շուկաներ չի մտնում։ Մոսկվան կտրականապես հերքում էր այդ մեղադրանքները։ Հետագայում պարզվեց, որ ուկրաինացի զինվորականները Մարիուպոլի նավահանգստում հրկիզել են ցորենը, ինչպես նաև ականապատել են Սև ծովի ջրատարածքի մի մասը: