ԵՐԵՎԱՆ, 19 օգոստոսի – Sputnik. Արդեն մի քանի ժամ է, ինչ մի քանի տասնյակ բեռնատարներ կրկին փակել են Մեղրի-Երևան ճանապարհի երթևեկելի գծերից մեկը Սիսիանի մոտ գտնվող կշռման կետի դիմաց։ Sputnik Արմենիային տեղեկությունը հայտնեց վարորդներից մեկը։
Նշենք, որ վարորդները պահանջում են տրանսպորտային միջոցների թույլատրելի առավելագույն քաշը 26 տոննայից դարձնել 28 տոննա, քանի որ հենց այդքան է Իրանում թույլատրելի սահմանաչափը։
«Այս խնդիրը պետք է անմիջապես լուծվի»,–ասաց բեռնատարի վարորդը։
Հավելենք, որ այս պահին մի քանի կիլոմետր երկարությամբ խցանում է առաջացել։
Հիշեցնենք` օգոստոսի 15-ին նույնպես վարորդները փակել էին ճանապարհը։ Sputnik Արմենիային ՏԿԵ մամուլի քարտուղար Սոնա Հարությունյանը հայտնել էր` նախարար Գնել Սանոսյանը բանակցել է Սիսիանի շրջանում Հայաստան-Իրան ճանապարհը փակած վարորդների հետ։ Պայմանավորվածություն է ձեռք բերվել, որ այնտեղ կանգնած մեքենաները կկշռվեն, և որոնք նորմայի սահմաններում են, կանցնեն, որպեսզի խցանումը բացվի։
Բացի այդ, վարորդները 4 պահանջից բաղկացած ցուցակ էին ներկայացրել նախարարին։ Սյունիքի մարզից վերադառնալուց հետո Սանոսյանը դրանք պետք է քննարկեր քաղաքաշինության, տեխնիկական և հրդեհային անվտանգության տեսչության ներկայացուցիչների և հենց վարորդների հետ: