ԵՐԵՎԱՆ, 19 օգոստոսի – Sputnik. Հայաստանում մեկնարկել է սիրողական որսաշրջանը։ Տեղեկությունը հայտնում է ՀՀ շրջակա միջավայրի նախարարությունը։
Շրջակա միջավայրի նախարար Հակոբ Սիմիդյանի հրամանով սահմանվել են 2022-2023 թվականների որսի կենդանիների ցանկը, դրանց օգտագործման թույլատրելի չափաքանակները և որսի ժամկետները։
2022-2023 թվականների որսաշրջանի ընթացքում որսի թույլտվություն ունեցող անձինք կարող են իրականացնել մոխրագույն ագռավի, սովորական կաչաղակի, գայլի և շնագայլի սահմանափակ որս։
Որս կարելի է իրականացնել միայն հինգշաբթի, ուրբաթ, շաբաթ և կիրակի օրերին, ինչպես նաև «ՀՀ տոների և հիշատակի օրերի մասին» օրենքով հաստատված տոների և հիշատակի օրերին։
Հրամանն ուժի մեջ մտնելու հաջորդ օրվանից որսորդական միություններին տրամադրվում են նախապես հայտագրված քանակի լիցենզիաներ, որոնք կազմակերպությունների ներսում կբաշխվեն որսորդական միության անդամների միջև։
Նախարարությունը որսորդությամբ զբաղվող և համապատասխան լիցենզիաներ ունեցող հայրենակիցներին հորդորում է որսի շրջանում ապահովել և պահպանել անվտանգության բոլոր կանոնները, որսն իրականացնել բացառապես տրամադրված լիցենզիաներում նշված չափաքանակով՝ գերորսը բացառելու նպատակով և, ինչն ամենակարևորն է, բնության նկատմամբ դրսևորել առավելագույն հոգատարություն։
Նշենք, որ շրջակա միջավայրի նախարար Հակոբ Սիմիդյանը հրամանը ստորագրել է օգոստոսի 11-ին։