ԵՐԵՎԱՆ, 16 օգոստոսի – Sputnik. Կատարի առևտրի և արդյունաբերության նախարարությունը սպառնացել է արտոնագրից զրկել ու մինչև մեկ միլիոն ռիալ (ավելի քան 330 հազար դոլար) տուգանք սահմանել այն ընկերությունների ու խանութների նկատմամբ, որոնք մուսուլմանական էթիկային հակասող նկարներով գովազդ կտեղադրեն: Տեղեկությունը հրապարակվել է գերատեսչության թվիթերյան էջում։
«Կատարի առևտրի և արդյունաբերության նախարարությունը գործարարներին, մատակարարներին ու առևտրի ցանցերին հորդորում է հարգել երկրի կրոնական արժեքներն ու ավանդույթները և չհրապարակել այնպիսի պատկերներով կամ ձայնային ուղեկցությամբ ապրանքներ, որոնք չեն համապատասխանում մուսուլմանական արժեքներին, հասարակական բարոյականությանը և ավանդույթներին: Երկրի օրենսդրությունը խախտող ընկերություններն ու խանութները երեք ամսով կփակվեն, մինչև մեկ միլիոն ռիալ տուգանք կվճարեն և կզրկվեն առևտրային գործունեություն իրականացնելու արտոնագրից»,– ասված է հաղորդագրությունում։
Նախարարությունը ոչ միայն պահանջել է ցուցափեղկերից հանել այն ապրանքները, որոնք չեն համապատասխանում բարոյականության ու համեստության մասին հասարակական պատկերացումներին, այլև չտալ նվերներ, որոնց վրա անբարոյական կարգախոսներ, խորհրդանիշներ կամ արտահայտություններ կլինեն։