ԵՐԵՎԱՆ, 16 օգոստոսի – Sputnik. Երեկ Լոռիում տեղի ունեցած սպանության դեպքի պատճառը գյուղատնտեսական աշխատանքներն են եղել, վեճը սկսվել է խոտը հակավորելու թեմայից և ավարտվել կրակոցներով։ Քննչական կոմիտեն նոր մանրամասներ է հայտնել 51-ամյա տղամարդու սպանության դեպքից։
Ավելի վաղ հայտնել էինք, որ Լոռիում երկու տղամարդ վիճել են, որից հետո 54-ամյա տղամարդը կրակել է 51-ամյա տղամարդու վրա, վերջինս հիվանդանոց տեղափոխվելու ճանապարհին մահացել է։
Պարզվել է` նրանք դեպքի նախորդ օրը պայմանավորվել են, որ Հագվի գյուղի բնակիչն իր տրակտորով կհակավորի Աքորի գյուղի բնակչին պատկանող խոտը։
«Երբ Հագվի գյուղի բնակիչն իր տրակտորով հասել է Աքորի գյուղի բնակչին պատկանող հանդամաս, տեսել է խոտի սակավությունը և հրաժարվել հակավորել այն։ Աքորիի բնակիչն օրվա ընթացքում մի քանի անգամ զանգահարել և հայհոյել է Հագվիի բնակչին, նրա ընտանիքի անդամներին, որից հետո տնից վերցնելով իր անվամբ հաշվառված «ԻԺ 39» մոդելի, 12մմ տրամաչափի երկփողանի որսորդական հրացանը` վերադարձել է հանդամաս և 2 անգամ կրակել Աքորիի բնակչի ուղղությամբ»,– ասված է հաղորդագրությունում։
Իսկ ականատեսները՝ տուժողի որդին և եղբորորդին, ձեռքերով և ոտքերով հարվածել են Հագվի գյուղի բնակչին՝ պատճառելով մարմնական վնասվածքներ:
Դեպքի առթիվ ՀՀ քրեական օրենսգրքի 155-րդ հոդվածի 1-ին մասով (սպանությունը) և 167-րդ հոդվածի 2-րդ մասի 7-րդ կետով (առողջությանը միջին ծանրության վնաս պատճառելը) նախաձեռնվել է քրեական վարույթ։
Հագվի գյուղի բնակիչը ձերբակալվել է, նա տվել է ինքնախոստովանական ցուցմունք։