ԵՐԵՎԱՆ, 15 օգոստոսի – Sputnik. «Սուրմալուի» որոնողափրկարարական աշխատանքները համակարգելու համար կառավարության մակարդակով օպերատիվ շտաբ չի ստեղծվել։ Այս մասին լրագրողների հետ ճեպազրույցում հայտնեց ՀՀ արտակարգ իրավիճակների նախարար Արմեն Փամբուխչյանը։
«Գործադիրի միջոցով ստեղծված նման շտաբ չկա, բայց մենք ունենք փրկարարական շտաբ, որը պարտադիր ստեղծվում է ցանկացած հրդեհի կամ որևէ այլ արտակարգ իրավիճակի ժամանակ։ Այս դեպքում հենց առաջին պահից ստեղծվել է, հենց որ մենք հասկացել ենք միջադեպի բարդությունը»,- հայտնեց նախարարը։
Փամբուխչյանը հստակեցրեց, որ պետական այլ գերատեսչություններ, մասնավորապես առողջապահության նախարարությունը օպերատիվ շտաբում ներգրավված չեն։ Բայց անընդհատ կապի մեջ է ԱԻՆ-ի հետ։
«Առողջապահության փոխնախարարն այստեղ է եղել, ՏԿԵ նախարարն այստեղ է եղել իր անձնակազմով, մեզ տրամադրել են մի շարք տեխնիկա, այսինքն` հանրագումարում ստացվում է, որ գործում է կառավարության կողմից շտաբ, բայց յուրաքանչյուր գերատեսչություն իր կարիքները գնահատելով, իրար հետ համագործակցելով` կարողանում են կառավարել իրավիճակը»,- ասաց նա։
Հիշեցնենք՝ «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։
Զոհերի թիվն այս պահին 6 է, 15 քաղաքացի անհետ կորած է համարվում:
Հրդեհաշիջման աշխատանքներին մասնակցում է 350 փրկարար, 150 կամավոր։
Որոնողափրկարարական աշխատանքները շարունակվում են։Պայթյունի հետևանքով տարբեր ԲԿ-ներում բուժումը շարունակում է 21 տուժած։