ԵՐԵՎԱՆ, 15 օգոստոսի – Sputnik. Հայտնի երգիչ Արամ MP3-ն չեղարկել է «Մեցցո» ակումբում կայանալիք իր համերգը։ Նա այդ մասին հայտնել է ինստագրամյան էջի «սթորի» բաժնում։
«Հայտնի պատճառներից ելնելով («Սուրմալու» առևտրի կենտրոնում երեկ տեղի է ունեցել պայթյուն, ինչի հետևանքով կան զոհեր և վիրավորներ. խմբ.)` ես չեղարկում եմ այսօրվա համերգը և տեղափոխում անհայտ ժամկետով։ Մնացածի մասին ձեզ կասի համերգի տնօրինությունը»,– նշել է երգիչը։
Տեսաուղերձում նա հույս է հայտնել, որ պայթյունի հետևանքով կորուստները քիչ կլինեն, և բոլորին հորդորել է աղոթել, որպեսզի անհետ կորածները շուտ և ողջ հայտնաբերվեն։
Հիշեցնենք՝ «Սուրմալու» առևտրի կենտրոնում պայթյուն է տեղի ունեցել օգոստոսի 14-ին՝ մոտավորապես 13։23-ին։
Զոհերի թիվն այս պահին 6 է, 17 քաղաքացի անհետ կորած է համարվում: Տարբեր ԲԿ-ներում բուժումը շարունակում է 13 տուժած։
Հրդեհաշիջման աշխատանքներին մասնակցում է 350 փրկարար, 150 կամավոր։
Որոնողափրկարարական աշխատանքները շարունակվում են։