ԵՐԵՎԱՆ, 14 օգոստոսի - Sputnik. Մինչ հրշեջները փորձում են հանգցնել «Սուրմալու» առևտրի կենտրոնում տեղի ունեցած պայթյունից հետո բռնկված հրդեհը, այն շարունակում է տարածվել։ Այս մասին դեպքի վայրից հայտնում է Sputnik Արմենիայի թղթակիցը։
«Հրշեջները դեռ չեն նկատել կրակի նոր աղբյուրը։ Այն առաջինը նկատել են տեղում հավաքված քաղաքացիները, ովքեր այս պահին փորձում են սեփական ուժերով, դույլով ջուր լցնելով մարել կրակը կամ թույլ չտալ, որ այն տարածվի, մինչ հրշեջները կհասնեն կրակի նոր օջախին»,– հայտնում է նա։
Ըստ որոշ տեղեկությունների, պայթած հրավառության պարագաները վնասել են գազի խողովակը, որի հետևանքով հրդեհն ու դրա ընդգրկած տարածքը մեծացել է` տարածվելով հարևան խանութների ու պահեստների վրա։
Sputnik Արմենիայի թղթակիցը նաև հայտնում է, որ ծուխը ևս ուժեղացել է, մարդիկ դժվարությամբ են շնչում։ Տեղում բժշկական դիմակների խիստ կարիք կա, բայց դրանք բացակայում են։
Առանց անհրաժեշտ արտահագուստի ու դիմակների են աշխատում նաև տեղում ծառայություն իրականացնող ոստիկանները։
Ավելի վաղ հայտնել էինք, որ այսօր ժամը 13։23-ին Ճգնաժամային կառավարման ազգային կենտրոն ահազանգ է ստացվել, որ «Սուրմալու» առևտրի կենտրոնում տեղի է ունեցել պայթյուն։
Հրդեհի բարդության «Թիվ 3» կանչով դեպքի վայր են մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատներից 20 մարտական հաշվարկ։