ԵՐԵՎԱՆ, 13 օգոստոսի -Sputnik. Էստոնիայում ձերբակալված «Իզվեստիայի» թղթակից Քսենիա Սոլդատովայի և օպերատոր Դմիտրի Տիմոֆեևի վիզաները այդ երկրի իշխանությունները չեղյալ են հայտարարել և երեք տարով արգելել են մուտք գործել Եվրամիության երկրներ: Այս մասին հայտնում է պարբերականը։
Բացի այդ, «Իզվեստիան» հրապարակել է փաստաթուղթ, որում ասվում է, որ Սոլդատովայի վիզան անվավեր է ճանաչվել այն պատճառով, որ «այնտեղ ապրելու ենթադրյալ պայմանները և նպատակը հիմնավորված չեն եղել»:
Թղթակից Քսենիա Սոլդատովան և օպերատոր Դմիտրի Տիմոֆեևը գնացքով գնում էին Նարվայից Տալլին: Նրանց են մոտեցել ոստիկանության աշխատակիցները և լրագրողին ցույց են տվել մի լուսանկար, որտեղ նա տանկ է նկարահանում։ Պարբերականի տվյալներով՝ նկարահանող խմբին տարել են ոստիկանության բաժին։ Այժմ պարբերականի աշխատակիցները սպասում են միգրացիոն ծառայության ներկայացուցչին։ Թե ինչում են նրանց մեղադրում՝ հայտնի չէ։
Ռուսաստանի ԱԳՆ պաշտոնական ներկայացուցիչ Մարիա Զախարովան իր հերթին նշել է, որ Էստոնիայում Ռուսաստանի դեսպանատունը վերահսկում է ձերբակալված լրագրողների հետ կապված իրավիճակը և ձեռնարկում է անհրաժեշտ ամեն ինչ նրանց աջակցելու համար:
Օգոստոսի 11-ին Էստոնիայի ԱԳՆ-ն հայտնել էր, որ երկիրը փակում է սահմանները Ռուսաստանի քաղաքացիների համար, որոնց հանրապետությունն ավելի վաղ տրամադրել էր շենգեն վիզա: