ԵՐԵՎԱՆ, 13 օգոստոսի – Sputnik. Էրզրումում ընթացող Եվրոպայի բռնցքամարտի պատանիների առաջնությունում Հայաստանը տարավ երրորդ հաղթանակը։ Տեղեկությունը հայտնում է Հայաստանի բռնցքամարտի ֆեդերացիայի մամուլի ծառայությունը։
«50 կգ քաշային Տիգրան Հովսեփյանը կամային հաղթանակի հասավ ռումինացի Անդրեյ Ջեհբանի նկատմամբ։ Առաջին ռաունդում հայ մարզիկը հաղթեց 5։0 հաշվով, բայց երկրորդում ռումինացին ակտիվացավ ու առավելության հասավ 4։1 հաշվով։ Վճռորոշ ռաունդում Տիգրանը, դրսևորելով կամային բարձր որակներ, պարտության մատնեց մրցակցին»,–նշված է հաղորդագրության մեջ։
Այսօր երեկոյան մրցահերթում Հայաստանն ունի ևս երկու ներկայացուցիչ։ Ռինգ դուրս կգան 46 կգ քաշային Էրիկ Ապերյանն ու 57 կգ քաշային Ալեն Ստեփանյանը, որը կանցկացնի իր երկրորդ մենամարտը։