ԵՐԵՎԱՆ, 12 օգոստոսի – Sputnik․ Հնդկական ծագում ունեցող բրիտանացի հայտնի գրող Սալման Ռուշդին դանակի 10-15 հարված է ստացել։ Այդ մասին հայտնել է «Ասոշիեյթեդ Պրես» գործակալության լրագրողը, որը Ռուշդիի վրա հարձակման ականատեսն է դարձել։
ԶԼՄ-ների հաղորդմամբ՝ գրողը դեռևս վիրահատական բաժանմունքում է։ Նրա վիճակի մասին տեղեկություներն դեռևս չեն հաղորդվում։ Հիշեցնենք, որ Սալման Ռուշդիին դանակահարել են ժամեր առաջ Նյու Յորքում։ Տղամարդը հարձակվել է գրողի վրա, երբ նա բեմում էր և պատրաստվում էր ելույթ ունենալ։ Հարվածներ են հասցվել գրողի պարանոցի շրջանում։
Հարձակում կատարած անձը ձերբակալվել է։
Ռուշդին շատ թշնամիներ ունի, նրա «Սատանայական բանաստեղծություններ» վեպը (1988) բողոք էր բարձրացրել մուսուլմանական աշխարհում, քանի որ այն հակաիսլամական են համարել. կերպարներից մեկը Մուհամեդ մարգարեին է հիշեցնում։ Այաթոլլա Հոմեյնին հրապարակավ անիծել էր Ռուշդիին և նրան մահապատժի դատապարտել, և ոչ միայն նրան, այլ բոլոր նրանց, ովքեր առանչություն ունեն գրքի լույս ընծայման հետ։ Այս հայտարարությունը առիթ հանդիսացավ Մեծ Բրիտանիայի և Իրանի միջև դիվանագիտական հարաբերությունների խզմանը։
Երկար ժամանակ Ռուշդին ստիպված թաքնվում էր, հանրության առաջ բավական հազվադեպ էր հայտնվում, այն էլ՝ անվտանգության աշխատակիցների ուղեկցմամբ։