ԵՐԵՎԱՆ, 12 օգոստոսի – Sputnik. Ռուսաստանը Հայաստանին կապիկի ծաղիկ հիվանդության ախտորոշման երկու թեստային համակարգ է նվիրել, որոնք նախատեսված են 200 հետազոտության համար։ Տեղեկությունը Sputnik Արմենիային հայտնեց Հայաստանի առողջապահության նախարարության մամուլի քարտուղար Հռիփսիմե Խաչատրյանը։
«Ռուսաստանի Դաշնությունից ստացած թեստային համակարգերը նախատեսված են 200 հետազոտության համար, սակայն Հայաստանը թեստային համակարգեր է ստացել նաև ԵՄ-ից, հանրապետությունն ապահովված է անհրաժեշտ քանակությամբ թեստերով»,- ասաց Խաչատրյանը։
Նրա խոսքով` Հայաստանում կապիկի ծաղիկի վարակի դեպքեր առ այսօր չեն գրանցվել։ Սահմանային անցակետերում կանխարգելիչ միջոցառումներ են իրականացվում վարակի մուտքը կանխելու համար։
Հուլիսի վերջին Ռոսպոտրեբնադզորի մամուլի ծառայությունը հայտնել էր, որ Ռուսաստանը Հայաստանին, Ղազախստանին, Ուզբեկստանին և Թուրքմենստանին է փոխանցել «Վեկտոր» պետական գիտական կենտրոնի արտադրած` կապիկի ծաղկի հայտնաբերման թեստ–համակարգեր։