ԵՐԵՎԱՆ, 11 օգոստոսի – Sputnik. Հայկական լաստանավի գործարկման շուրջ աշխատանքները շարունակվում են։ Էկոնոմիկայի նախարարությունը մոտ ապագայում կհրապարակի չվացուցակը։ Այսօր կառավարության նիստից հետո լրագրողների հետ ճեպազրույցում տեղեկությունը հայտնեց ՀՀ էկոնոմիկայի նախարար Վահան Քերոբյանը։
«Մենք հիմա վերջնական աշխատանք ենք անում, շուտով կհրապարակվի չվացուցակը, 15-20 օրերի հարց է»,– ասաց նա։
Այլ մանրամասներ Քերոբյանը չցանկացավ բացահայտել, նշեց միայն, որ դիտարկվում է բացառապես Փոթիի նավահանգստից օգտվելու տարբերակը։
«Դա հեշտ հարց չէ, հատկապես որ զուգորդվում էր այսպիսի ծանր աշխարհաքաղաքական փոփոխություններով ու ճնշմամբ, բայց, այնուամենայնիվ, մեր աշխատանքը, հույս ունենք, շատ շուտով արդյունք կտա»,– ասաց նախարարը։
Հիշեցնենք` Sputnik Արմենիայի գրավոր հարցմանն ի պատասխան էկոնոմիկայի նախարարությունից հայտնել էին, որ օգոստոսին նախատեսվում է լաստանավային հաղորդակցություն գործարկել վրացական «Փոթի» նավահանգստից դեպի «Կովկաս» նավահանգիստ։
Հայաստանի կառավարության` 2022 թվականի մարտի 24-ի որոշման համաձայն` նախատեսվում է, որ լաստանավի օպերատորը՝ տեղական «C&M International» լոգիստիկ ընկերությունը, «Փոթի» նավահանգստից դեպի «Կովկաս» ու հակառակ ուղղությամբ շաբաթական երկու ուղերթ կիրականացնի:
Նշենք, որ վրացական «Փոթի» նավահանգստի ու ռուսական «Կովկաս» նավահանգստի միջև կանոնավոր լաստանավային հաղորդակցությունը պետք է գործարկվեր հունիսի 15-ից: Սակայն դա տեղի չունեցավ քաղաքական պատճառներով։ Փոթիի նավահանգիստը ղեկավարում է «APM Terminals»-ի հոլանդական դուստր ընկերությունը, որը պետք է թույլտվություն ստանա մայր ընկերությունից, որպեսզի կանաչ լույս վառի լաստանավային հաղորդակցության համար:
Այդ իսկ պատճառով Հայաստանը որպես այլընտրանք դիտարկում է մուլտիմոդալ փոխադրումները․ բեռները Հայաստանից երկաթուղով կամ բեռնատարներով կհասնեն «Փոթի» նավահանգիստ, այնտեղից կոնտեյներներով և նավերով՝ մինչև ռուսական «Կովկաս» նավահանգիստ։
Լաստանավից կկարողանան օգտվել մրգեր և բանջարեղեն արտահանողները։ Լաստանավի տարողությունը կազմում է 50 բեռնատար և 40 վագոն: Ընդ որում` Հայաստանի կառավարությունը առաջին 6 ամիսների ընթացքում բիզնեսի համար ամբողջությամբ կսուբսիդավորի լաստանավի ծախսերը։