ԵՐԵՎԱՆ, 11 օգոստոսի – Sputnik. ՀՅԴ ԳՄ անդամ, ԱԺ նախկին պատգամավոր Սուրեն Մանուկյանի նկատմամբ քաղաքական հետապնդումները, ֆիզիկական խոշտանգումները, առանց հիմքի բնակարանի խուզարկումը, վարկաբեկման փորձերը սկիզբ են առել դեռևս ամիսներ առաջ։ Նման հաղորդագրություն է տարածել ՀՅԴ Հայաստանի ԳՄ լրատվական ծառայությունը անդրադառնալով ԱԺ նախկին պատգամավոր Խաչատուր Քոքոբելյանի հոր` Գրիշա Քոքոբելյանի առևանգման դեպքով Մանուկյանի ձերբակալմանը։
Հուլիսի 28-ին հայտնի դարձավ, որ կորել է ԱԺ նախկին պատգամավորի հայրը։ Նրա անհետացման դեպքի առիթով քննչական կոմիտեում նախաձեռնվել է քրեական վարույթ։
«Այսօր Սուրեն Մանուկյանը հրավիրվել էր ՀՀ քննչական կոմիտե, որպես տուժող քննչական գործողության մասնակցելու համար։ Ճանապարհին, այսօրվա իրավապահ մարմիններին բնորոշ բեմականացմամբ, բռնության գործադրմամբ Սուրեն Մանուկյանը ձերբակալվել է՝ անձի առևանգման կասկածանքով։ Դատապարտելով անձի առևանգման ենթադրյալ հանցագործությունը, մերժելի ենք համարում անձի անմեղության կանխավարկածի ոտնահարումը»,–ասված է ՀՅԴ ԳՄ հաղորդագրության մեջ։
Միաժամանակ, նշվում է նաև, որ անընդունելի համարելով քաղաքական հետապնդման հերթական դրսևորումը, 90-ականների գործելակերպը կրկնող՝ ընդդիմության վարկաբեկման ու դաշնակցականների նկատմամբ շինծու քրգործեր հարուցելու գործելակերպը, վստահ են, որ դրանք ձախողման են դատապարտված։
Հիշեցնենք, որ ոստիկանությունն ու քննչական կոմիտեն հայտնել են, որ այսօր Քոքոբելյանի հոր առևանգման գործով 2 անձ է ձերբակալվել, որոնցից մեկն էլ Մանուկյանն է։