ԵՐԵՎԱՆ, 11 օգոստոսի – Sputnik. Ադրբեջանի ավտոմոբիլային ճանապարհների պետական գործակալությունը հայտարարել է Բերձոր քաղաքը շրջանցող նոր ճանապարհի շինարարության ավարտի մասին։ Տեղեկությունը հայտնում են ադրբեջանական լրատվամիջոցները։
Նոր ճանապարհի կառուցման աշխատանքները սկսվել են 2021 թվականի հուլիսին։ Մայրուղու ընդհանուր երկարությունը 32 կմ է, որից 10 կմ-ն անցնում է Հայաստանի Հանրապետության տարածքով։
Երթևեկելի մասի լայնությունը 7-ից 10,5 մետր է։ Լանջերի վրա այն ունի երթևեկության երեք շերտ, մնացած ճանապարհին՝ երկու։
Նշենք, որ Հայաստանում ճանապարհի կառուցումը կտևի մոտ 250 օր։ Մինչ այդ, մարդիկ ստիպված են լինելու Հայաստանի Հանրապետությունից Արցախ հասնել 4 կմ երկարությամբ գրունտային ճանապարհով, որը միանում է Աղավնո գյուղից ոչ հեռու գտնվող նախկին մայրուղուն։
Աղավնոյի գյուղապետ Անդրանիկ Չավուշյանը հայտնել է, որ բնակիչները պատրաստվում են լքել գյուղը, քանի որ անորոշ վիճակ է, դեռ հայտնի չէ, թե ինչպես կդասավորվի նրանց ճակատագիրը։
Հիշեցնենք` ավելի վաղ հայտնի էր դարձել, որ երեք բնակավայրերի՝ Բերձորի, Աղավնոյի և Ներքին Սուսի բնակիչները ստիպված են մինչև օգոստոսի 25-ը լքել իրենց տները։
Որոշ տեղեկությունների համաձայն՝ տարածքները պետք է հանձնվեն Ադրբեջանին, թեև պաշտոնապես ասվում է, որ բնակիչները տարհանվում են «քաղաքացիական պաշտպանության միջոցառումների շրջանակում»։ Այս բնակավայրերը հարակից են Լաչինի միջանցքին, որը շուտով կանցնի Բաքվի վերահսկողության տակ, իսկ Հայաստանի Հանրապետությունից դեպի Լեռնային Ղարաբաղ շարժը կկազմակերպվի նոր ճանապարհով։