ԵՐԵՎԱՆ 10 օգոստոսի – Sputnik. Հայաստանի ֆուտբոլի հավաքականի նախկին դարպասապահ Ռոման Բերեզովսկին մրցանակներ է հանձնել Երևանում Ռուսական տան կազմակերպած սպորտային իր կարիերային նվիրված վիկտորինայի հաղթողներին։
Բերեզովսկին նշել է, որ վիկտորինան իր անվան ֆուտբոլային մեծ մրցաշարի փուլերից մեկն է, որը կազմակերպվում է սահմանամերձ բնակավայրերում ապրող երեխաների համար։
«Այս տարվա սեպտեմբերին Վայոց Ձորի և Սյունիքի մարզերում բնակվող դպրոցականների համար, մենք` Ռուսական տունը, «Բարու ճանապարհ» ՀԿ–ն և Հայաստանի ֆուտբոլի ֆեդերացիան ֆուտբոլային մրցումներ կանցկացնենք, որոնք կավարտվեն Երևանում`մեծ եզրափակիչով», – ասել է նա։
Նրա խոսքով` մրցումները ոչ միայն երեխաների մեջ սեր կսերմանեն ֆուտբոլի նկատմամբ, այլ նաև դաստիարակչական բնույթ կկրեն։
«Քչերը գիտեն այն, ինչը հիմա կպատմեմ, քանի որ Բերեզովսկին չափազանց համեստ մարդ է և անձամբ երբեք այդ մասին չի խոսել։ 1990-ականներին, երբ Հայաստանը ծանր ժամանակներ էր ապրում, Բերեզովսկին Կապանում ֆուտբոլ էր խաղում ռումբերի պայթյունների տակ։ Ոչ մի բան նրան նպատակին հասնելուց հետ չպահեց, նույնիսկ սարսափելի պայթյունները», – ասաց Հայաստանում «Ռոսսոտրուդնիչեստվոյի» ներկայացուցչության ղեկավար Վադիմ Ֆեֆիլովը։
Նշենք, որ 2023 թվականին մրցումները կանցկացվեն նաև Հայաստանի մյուս մարզերում։ Սյունիքում և Վայոց Ձորում անցկացվող մրցումներին կժամանի Ռոման Բերեզովսկին և հաղթողներին կշնորհի մրցանակներ և կբաժանի ինքնագրեր։
Հայաստանի միջնակարգ դպրոցների աշակերտների ֆուտբոլային մեծ մրցաշարը նախատեսվում է անցկացնել 2023 թվականի մայիսին։
Նախագծի գաղափարը «Բարու ճանապարհ» ՀԿ–ինն ու Հայաստանում «Ռոսսոտրուդնիչեստվոյի» ներկայացուցչությանն է։ Նախաձեռնությանը աջակցել են ՀՀ ԿԳՄՍՆ–ը, Հայաստանի ֆուտբոլի ֆեդերացիան և Sputnik Արմենիա գործակալությունը։