ԵՐԵՎԱՆ, 10 օգոստոսի – Sputnik. Իրանցուն հեռակա կարգով ԱՄՆ–ում մեղադրել են Սպիտակ տան ազգային անվտանգության գծով նախկին խորհրդական Ջոն Բոլթոնի սպանությունը կազմակերպելու փորձի մեջ։ Այս մասին հայտնում է ՌԻԱ Նովոստին` հղում անելով ԱՄՆ–ի արդարադատության նախարարությանը։
Ինչպես ասվում է գերատեսչության կայքում հրապարակած հաղորդագրության մեջ, Իրանի քաղաքացի և իսլամական հեղափոխության պահապանների կորպուսի անդամ 45-ամյա Շահրամ Փուրսաֆիին մեղադրում են նրանում, որ սկսած 2021 թվականի հոկտեմբերից նա փորձում էր կազմակերպել Բոլթոնի սպանությունը։
Արդարադատության նախարարության տվյալներով` ըստ ամենայնի պատճառը վրեժխնդրությունն էր 2020 թվականի հունվարին իսլամական հեղափոխության պահապանների կորպուսի հրամանատարներից մեկի` Ղասեմ Սոլեյմանի սպանության համար։ Արդարադատության նախարարությունը հայտնում է, որ Բոլթոնին վերացնելու համար մեղադրյալը 250 հազար դոլար էր առաջարկում, այնուհետև համաձայնել էր մինչև 300 հազար ավելացնել գումարը։
Հաղորդագրության մեջ ասվում է, որ հետագայում Փուրսաֆին փնտրել է Բոլթոնի բնակության վայրը, իսկ կատարողից պահանջել նրա սպանության տեսագրությունը, որպես ապացույց։ Գերատեսչությունը հայտնում է, որ նրան վերագրվող հոդվածներով հանրագումարային պատիժ է նախատեսվում մինչև 25 տարի ազատազրկման կամ մինչև կես միլիոն դոլար տուգանքի տեսքով։ Հաղորդագրության մեջ նշվում է, որ ինքը` մեղադրյալը, արտերկրում է և գտնվում է ազատության մեջ։