ԵՐԵՎԱՆ, 9 օգոստոսի – Sputnik. Ֆրանսիայի նախագահ Էմանուել Մակրոնն ու Բրիտանիայի` հրաժարական ներկայացրած վարչապետ Բորիս Ջոնսոնը զրուցել են հեռախոսով և Ուկրաինային տրամադրվող ռազմական, տնտեսական և մարդասիրական օգնության համակարգմանն առնչվող հարցեր քննարկել։ Տեղեկությունը հրապարակվել է Ֆրանսիայի նախագահի կայքում։
Հեռախոսազրույցը տեղի է ունեցել այսօր։
«Հանրապետության նախագահն ու վարչապետը հաստատել են, որ Ուկրաինային աջակցելու հարցում իրենք վճռական են այնքան ժամանակ, քանի դեռ անհրաժեշտությունը կա, ընդգծվել է նաև գործընկերների միջև համակարգման բարձր մակարդակը` ռազմական, մարդասիրական և տնտեսական հարցերում ուկրաինացիների կարիքները բավարարելու համար», – ասված է հաղորդագրությունում։
Մակրոնն ու Ջոնսոնը քննարկել են նաև պարենային ճգնաժամի խնդիրը և նշել, որ աջակցում են Ուկրաինայից հացահատիկը դուրս բերելու եվրոպական ջանքերին։
Բացի այդ, կողմերն անդրադարձել են նաև համագործակցության հարցերին։
Ռուսաստանն ավելի վաղ ՆԱՏՕ-ի երկրներին բողոքի նոտա է հղել Ուկրաինային ռազմամթերք մատակարարելու համար։ ՌԴ ԱԳ նախարար Սերգեյ Լավրովը նշել է, որ ցանկացած բեռ, որն Ուկրաինայի համար ռազմամթերք կպարունակի, Ռուսաստանի համար օրինական թիրախ կդառնա։ ՌԴ արտաքին քաղաքական գերատեսչությունում հայտարարել են, որ ՆԱՏՕ-ի երկրները կրակի հետ են խաղում` Ուկրաինային ռազմամթերք մատակարարելով։ ՌԴ նախագահի մամուլի խոսնակ Դմիտրի Պեսկովն ընդգծել է, որ Արևմուտքի կողմից Ուկրաինային զենքի տրամադրումը չի նպաստում ռուս-ուկրաինական բանակցությունների հաջողությանը և բացասական ազդեցություն է թողնում։