ԵՐԵՎԱՆ, 9 օգոստոսի – Sputnik. ԱՄՆ դրոշի ներքո հանդես եկող գրոսմայստեր Լևոն Արոնյանը շնորհավորել է Հայաստանի հավաքականին Հնդկաստանի Չեննայ քաղաքում ընթացող շախմատի համաշխարհային օլիմպիադայում արծաթե մեդալ նվաճելու կապակցությամբ։ Այդ մասին Արոյանը գրառում է արել Twitter-ի իր էջում։
«Ուզբեկստանի, Հնդկաստանի երիտասարդ թիմերն անհավանական ելույթներ ունեցան, բայց Հայաստանն ինձ համար առանձնահատուկ է։ Արծաթ նվաճել և ոսկուն այդքան մոտ լինելն ուղղակի անհավատալի է, և ես շատ հպարտ եմ դրա համար։ Հուսով եմ, որ նման սենսացիոն ելույթը կարժանանա համարժեք ճանաչման»,- գրել է Արոնյանը։
Նշենք, որ Լևոն Արոնյանը բաց թողեց Շախմատի համաշխարհային 44-րդ օլիմպիադայի 7-րդ տուրի պարտիաները, որոնցում ԱՄՆ-ի հավաքականը պետք է խաղար ՀՀ հավաքականի հետ, փաստացի չխաղալով նախկին թիմակիցների դեմ։
Հիշեցնենք, որ Հնդկաստանում ընթացող շախմատի համաշխարհային օլիմպիադայում Հայաստանի հավաքականը արծաթե մեդալ է նվաճել՝ մրցաշարում տանելով ամենաշատ հաղթանակները՝ 9: Հայաստանի հավաքականը, որը գլխավորում էր գրոսմայստեր Արման Փաշիկյանը, միայն լրացուցիչ գործակիցներով պարտվեց Ուզբեկստանի թիմին: