ԵՐԵՎԱՆ, 8 օգոստոսի – Sputnik. ՀՀ ազգային անվտանգության ծառայությունը Sputnik Արմենիայի գրավոր հարցմանն ի պատասխան հերթական անգամ հրաժարվել է բացահայտել ՀՅԴ ներկայացուցիչների մուտքն արգելելու պատճառները՝ վկայակոչելով այն փաստը, որ տեղեկությունը վերաբերում է նրանց անձնական կյանքին։
Օգոստոսի 1-ին հայտնի դարձավ, որ Նիդեռլանդների Հայ դատի գրասենյակի ատենապետ Մասիս Աբրահամյանին արգելել են մուտք գործել Հայաստան։ Նա Նիդեռլանդների «Գարեգին Նժդեհ» երիտասարդական միության անդամ Սյունե Աբրահամյանի հայրն է, որին էլ նախորդ օրը թույլ չէին տվել մուտք գործել Հայաստան։
«Ձեր կողմից հայցվող տեղեկությունը վերաբերում է Մասիս Աբրահամյանի և Սյունե Աբրահամյանի անձնական կյանքին, ուստի, հիմք ընդունելով «Տեղեկատվության ազատության մասին» օրենքի պահանջը` հայցվող տեղեկությունը չի կարող տրամադրվել»,- ասված է ԱԱԾ–ի պատասխանում։
Նշենք, որ հուլիսի 13-ին էլ արգելվել էր ՀՅԴ բյուրոյի անդամ, Ֆրանսիայի հայկական կազմակերպությունների համակարգող խորհրդի (CCAF) համանախագահ Մուրադ Փափազյանի մուտքը Հայաստան։ Այս դեպքում ևս ԱԱԾ–ն հղում էր արել «անձնական կյանքին» ու ոչ մի պարզաբանում չէր տվել։
Բայց դա չէր խանգարել, որ ՀՀ վարչապետի աշխատակազմը հայտարարի, որ Մուրադ Փափազյանը նախորդ տարվա հունիսի 1-ին Ֆրանսիայում ՀՀ դեսպանության մոտ վարչապետի գլխավորած կառավարական պատվիրակության՝ ՀՀ պետական դրոշակիր ավտոշարասյան դեմ հարձակում կազմակերպած անձանցից մեկն է: Վարչապետի աշխատակազմի տեղեկատվության և հասարակայնության հետ կապերի վարչությունից հայտնել էին, որ ավտոշարասյան ուղղությամբ նետվել են տարբեր իրեր, առարկաներ, վարչապետի ավտոմեքենան ենթարկվել է հարձակման, և ստեղծված իրավիճակը հաղթահարվել է միայն ֆրանսիական ոստիկանության և անվտանգության ուժերի ջանքերի արդյունքում: